TIRANË- Besim Ndregjoni, ish-i përndjekur politik dhe kryetar i njërës prej shoqatave që mbron interesat e kësaj shtrese, është duke u proceduar penalisht pasi ka bërë thirrje për djegien e bunkerit, ditën e protestës së PD-së. Duke folur për ‘Report TV’ ai tha se jo vetëm ai, por edhe deputetë të PD-së kanë bërë thirrje për shaktërrimin e bunkerit, ndaj nuk e kupton arsyen se pse policia procedon vetëm atë.
“Z. Basha dhe z. Berisha ishin organizues të protestës, unë isha i ftuar në atë protestë. Çdo protestë ka skenarin e vet, skenarin e protestës, pastaj se si e përdor politika skenarin është tjetër gjë. Oficeri më tha jeni i akuzuar se keni bërë thirrje për dhunë. Më fal i thash: hapi kërkesat që të kam sjellë në komisariat, kam thënë: Sot do të protestojmë të shkulim bunkerin, simbolin e diktaturës”. Kështu u shpreh Ndregjoni.
Sipas tij, edhe deputetët bënë thirrje për bunkerin sepse ishin kundër simboleve të diktaturës, kundër dekorimeve të krimineleve. “Nuk ishte kjo një thirrje që u përdor për të dhunuar. Do të ishte thirrje për dhunë nëse protestuesit veç bunkerit do t’i kishin vënë flakën makinave, institucioneve, se jemi mësuar t’i shohim këto 25 vjet. Por jo protestuesit ishin shumë në rregull, ai bunker duhet hequr”, sqaroi më tej Ndregjoni.
Besim Ndregjoni tha se Rama duhet t’i kërkojë falje ish-të përndjekurve për vendosjen e këtij bunkeri. “Djegia ishte një revoltë kombëtare. Bunkerin nuk e dogjëm ne, e dogji populli”, theksoi ai.
