Pas më shumë se 14 orësh diskutime me akuza dhe kundër akuza, deputetët e Kuvendit votuan projektligjin për Buxhetin e vitit 2016. Ai u miratua në parim me 84 vota pro, ndërsa nuk u votua hetimi ndërkombëtar i CEZ pasi 52 deputetë ishin kundër. Kuvendi miratoi me shumicë të cilësuar edhe ndryshimet në Kodin Penal, atë të Familjes dhe të Punës. Më konkretisht:
Me 85 vota pro, Kuvendi miratoi edhe ndryshimet në ligjet “Për akcizat”, “Për taksat kombëtare”, “Për sistemin e taksave vendore” dhe “Për mbledhjen e sigurimeve shoqërore dhe shëndetësore”
Po ashtu, me nga 85 vota Kuvendi miratoi shtesën në ligjin “Për sigurimet shoqërore” dhe në atë “Për sigurimin e detyrueshëm të kujdesit shëndetësor”.
Kuvendi gjithashtu miratoi me 85 vota pro ligjin“Për punëkërkuesit” dhe me 79 vota atë “Për trajtimin e pronës”.
Me shumicë të cilësuar u votuan Kodi i Familjes që mori 86 vota pro, Kodi Penal që mori 84 vota pro dhe Kodi i Punës 85 vota pro.
Ministri i Financave Shkëlqim Cani tha se 14.5 miliardë lekë në buxhetin e vitit të ardhshëm do të vijnë nga lufta kundër informalitetit. Ai akuzoi opozitës se po përhap panik në publik.
“U është fiksuar ideja e panikut, për të ngjallur panik te njerëzit për të krijuar idenë, sikur do bëhet qameti. Në këtë buxhet të vitit 2016, 14.5 miliardë lekë do të vijnë nga lufta kundër informalitetit. Nga reforma e tërë kundër informalitet. E keni aty në vend që të filozofoni”, tha Cani.
Investimet, tha ai, këtë vit janë 92 miliardë lekë më të larta. Cani tha se ka ndryshuar raporti i shërbimeve operative me investimet, 40-60%.
“80 e ca për qind e ekonomisë shqiptare është private. Nuk them se cila parti e ka bërë se të gjithë e kemi bërë në këto 25 vite privatizimin, nuk po them kush më shumë e kush më pak. Po që të jetë 80 e kusur përqind e ekonomisë në duart e privatit dhe t’i të mendosh se çfarë parash shpenzon shteti është dozë e thellë naivititet. Shteti pjesën e vet në këtë rritje ekonomike me 92 mld lekë e ka pjesën e vet”, tha ministri Cani.
Ish ministri i Financave Ritvan Bode tha se qeveria ka dështuar në mbledhjen e taksave, dhe se faktorët e paraqitur nga kryeministri Edi Rama janë thjesht apologji për të fshehur evazionin që ka në sistemin e doganave.
Referuar rënies së çmimit të naftës në bursa, Bode tha se pagesa e importuesve bëhet me lekë dhe se dollari është rritur nga 106 në 128 lekë.
“Shqiptarët këtu i pagujanë importuesit në lekë dhe dollari nga 106 lekë është 128 lekë. Janë rreth 20 e ca lekë për litër që duhet ti kishim marrë më shumë, po ku i kanë dhe nuk i bëjën hesapet me leke, me tregun me çmime më të larta të karburantit në të gjithë rajonin”, tha Bode.
Bode tha se mospagesa e TVSH-së për HEC-et private është faktor për mosrealizimin e parashikimit të qeverisë, për të cilën kryeministri Rama tha se ka rënie të importit të energjisë.
“TVSH e energjisë elektrike llogaritet dhe paguhet mbi bazën e çmimit përfundimtar që ka te qytetari dhe nuk ka rëndësi nëse vjen te importi. Me këtë zbuluan faktin se nuk kishin paguar TVSH e të gjithë HEC private që prodhojnë energji, që në procesin e pagimit të taksave do të rimbursohen në pjesën e rimbursueshme. Të gjitha janë thjesht apologji për të fshehur evazionin e madh që ka në sistemin e doganave”, tha Bode.
