“Bankers Petroleum” njoftoi se ka arritur një marrëveshje me qeverinë shqiptare për të hequr bllokimin mbi llogaritë e saj bankare dhe për të vijuar normalisht aktivitetin në fushën naftëmbajtëse të Patos-Marinzës.
Qeveria pretendon se kostot e deklaruara nga kompania kanadeze janë më të larta se ato realet për të evituar ndarjen e fitimit me shtetin. Në këtë diskutim janë përfshirë edhe organet tatimore, që pretendojnë 75 milionë dollarë nga kompania e nxjerrjes e shitjes së naftës dhe për rrjedhojë kanë bllokuar llogaritë bankare të saj. Sipas deklaratës, “Bankers” ra dakord të paguajë për organet tatimore një depozitë prej 10 % të shumës 57 milionë dollarë, që është pretendimi fillestar i administratës së taksave. Kjo shumë për shkak të interesave është rritur në 75 milionë dollarë.
Gjithashtu, kompania kanadeze ka rënë dakord të paguajë çdo muaj gjatë vitit të ardhshëm një shumë prej 4,275 milionë dollarë, deri në plotësimin e vlerës prej 57 milionë dollarë. Këto pagesa do të bëhen pa prekur ndërkohë diskutimin mes kompanisë dhe administratës së taksave, që çuan edhe në bllokimin e llogarive. Në kundërpërgjigje, pasi fitoi një shkallë në Gjykatën e Arbitrazhit, “Bankers” deklaroi se mund të reduktojë apo ndalojë aktivitetin në Shqipëri, ku ka mbi 1500 të punësuar dhe ku deklaron se ka investuar 1,4 miliardë dollarë. E ndodhur përballë një kërcënimi për ndërprerjen e aktivitetit nga një prej kompanive më të mëdha në vend, qeveria shqiptare vendosi të reagojë tre ditë më parë. Ajo e hodhi poshtë kërcënimin e “Bankers”, që deklaron se zotëron 6 % të Prodhimit të Brendshëm Bruto të vendit.
“Qeveria e Shqipërisë është e qartë për kërcënimet e bëra nga ‘Bankers Petroleum Ltd’, për të mbyllur apo kufizuar aktivitetin në zonën naftëmbajtëse të Patos-Marinzës. Teksa qeveria mirëpret partnerët e huaj apo vendas, pasuritë kombëtare të Shqipërisë janë një pasuri e të gjithë shqiptarëve dhe as nuk mund të keqpërdoren as mund të përdoren si kërcënim ndaj vendit”, thuhej në një deklaratë të publikuar edhe nga kryeministri Rama. Duke e ftuar t’u bindet ligjeve vendase, qeveria i bëri të qartë gjigantit kanadez se nuk do të lejojë, atë që e cilësoi si cenim të integritetit afatgjatë të pasurive të vendit. “Të gjithë kompanitë që punojnë në Shqipëri, qofshin të huaja apo vendase, duhet t’u binden rregulloreve dhe ligjeve në fuqi në Republikën e Shqipërisë. Qeveria shqiptare është e vetëdijshme për detyrimin dhe të drejtën e saj që të mos lejojë cënimin e integritetit afatgjatë të pasurive të çmuara të vendit”, mbyllej deklarata e qeverisë.
