Ja arsyet e vrasjes së të moshuarit në Fier

Zbardhet arsyeja e vrasjes së të moshuarit në Fier, trupi i të cilit u gjet në një kosh plehra pasditen e së dielës. 82- vjeçari Novruz Likometaj, i njohur ndryshe si Noke Likometaj, është vrarë nga 37- vjeçari Skënder Krasniqi, i cili u ndalua ditën e djeshme. Mendohet se shkak për kryerjen e aktit të rëndë, ishte ngacmimi që në mënyrë të vazhdueshme bënte i moshuari për nënën e të dyshuarit. Krimi u zbulua pas një hetimi intensiv dhe të dhënave të mbledhura nga të njohurit e banorët e lagjes ku banonte viktima. Bëhet e ditur se i moshuari ngacmonte herë pas here gratë e lagjes ku banonte. Ndërkohë që dyshohet se në krim kanë marrë pjesë më shumë se dy persona. Dyshimet paraprake janë se vrasja ka ndodhur pranë vendit ku u gjet trupi i pajetë, në lagjen ku Likometaj jetonte dhe se në errësirë dhe për shkak të motit të keq, autorët e dyshuar, të paktën dy persona, kanë përfituar për të hedhur trupin në plehra, duke tentuar të fshehin gjurmët, Mendohet se vrasja ka qenë e planifikuar, ashtu si koha e ekzekutimit, pasi hedhja e trupit në plehra gjatë pasdites është bërë duke shpresuar se ai do të zhdukej i mbledhur nga makina e plehrave, e cila bënte rregullisht pastrimin e kazanëve në mbrëmje. Trupi i pajetë i Likometaj u gjet nga një person që mblidhte kanoçe në plehra, duke u lajmëruar më tej policia. Viktima, ish-kryetar i sindikatës së transportit, kishte në pronësi me djemtë një agjenci turistike udhëtimi, të linjës Shqipëri-Greqi. Pas ekspertizës mjeko-ligjore rezultoi se trupi i viktimës ishte masakruar nga goditje me thikë dhe goditja vdekjeprurëse ishte bërë në fyt.