Deputeti socialist Ardit Bido ka publikuar një foto në rrjetet sociale nga protestat duke ngritur pyetjen se ç’punë kanë aktivistët e “Vetëvendosjes” që ndërhyjnë në Shqipëri.
Në foton e publikuar nga aktivistja e VV dhe të shpërndarë nga Bido, emri i deputetit socialist shfaqet i shkruajtur me spraj mbi një kosh mbeturinash.
Deputeti i PS i konsideron këto “forma gebelsiane”, duke iu drejtuar përmes një mesazhi publik Albin Kurtit, që të formojë qeverinë në Kosovë dhe t’i lërë protestat në Shqipëri.
“Ç’punë kanë aktivistët e Lëvizjes Vetëvendosje që ndërhyjnë, madje duke denigruar deputetë të Republikës së Shqipërisë? Nuk dua të futem në konspiracionin e vizitave të tua të pervershme në Delphi të Greqisë, por të bëj pyetjen e thjeshtë: çfarë i shtyn vetëvendosësit të piketojnë posaçërisht mua në këtë formë gebelsiane, që s’keni shans të më bëni ndonjëherë pis, sepse jam i pastër, jam me bindje pro Shqipërisë! Bëni qeveri në Kosovë e lërini protestat në Shqipëri!”, shkruan Bido në Instagram.
