Është djegur gjatë natës automjeti në pronësi të gazetarit të BIRN, Sami Curri.
Sipas deklaratës së vetë Currit, djegia e automjetit dyshohet të ketë qenë e qëllimshme dhe e lidhur drejtpërdrejt me punën e tij në fushën e gazetarisë.
Ngjarja ka ndodhur në rrethana ende të paqarta, ndërsa autoritetet kanë nisur hetimet për të zbardhur plotësisht rastin dhe për të identifikuar përgjegjësit.
“Kjo gjëja është e qëllimshme dhe është totalisht me synimin për të sjellë një mesazh tek unë dhe për punën që bëj, por së pari iu them që ata që e kanë bërë këtë veprim, as nuk do të më kërcënojnë ose frikësojnë dot sepse për mua gazetaria është një mision që i shërben interesit publik dhe do të vazhdojë me çdo lloj çmimi dhe një nga çmimet kjo ishte”, shprehet ai.
Curri ka theksuar se kohët e fundit ka trajtuar çështje të ndjeshme, të cilat mund të kenë shkaktuar reagime të tilla ekstreme.
“Rreth orës 02:58, të datës 26.04.2026, shërbimet e Policisë janë njoftuar nga shtetasi S. C., banues në Bulqizë (me profesion gazetar), se automjeti i tij tip “Ford Fiesta” ishte përfshirë nga flakët, ndërkohë që ishte i parkuar pranë banesës së tij. Menjëherë pas marrjes së njoftimit, shërbimet e Policisë, grupi hetimor dhe shërbimi zjarrfikës kanë shkuar në vendngjarje. Grupi hetimor, nën drejtimin e Prokurorisë, po vijon intensivisht veprimet për zbardhjen dhe dokumentimin ligjor të rastit, identifikimin dhe vënien para përgjegjësisë ligjore të autorit/ve, pasi paraprakisht dyshohet për djegie të qëllimshme. Materialet do t’i kalojnë Prokurorisë për veprime të mëtejshme”-njofton policia.
