Çështja e territorit mbetet në qendër të negociatave për Ukrainën dhe Rusinë. Presidenti ukrainas Volodymyr Zelensky tha se “çështja territoriale është elementi më i vështirë” i marrëveshjes së paqes.
Kremlini vazhdon të shtyjë Ukrainën të lëshojë territorin që ende kontrollon në lindje – diçka që Kievi ka pohuar prej kohësh se nuk do ta bëjë kurrë.
BBC shkruan se lëshimi i territorit ku jetojnë të paktën një e katërta e një milioni ukrainas – qytetet e “rripit të fortesës” të Donetskut, Slovyansk, Kramatorsk dhe Druzhkivka – nuk do të jetë i pranueshëm për shumicën e ukrainasve.
Luftimet kanë vazhduar për qytetin strategjik të Pokrovskut, të cilin Rusia thotë se e ka pushtuar, por Ukraina e hodhi poshtë këtë pretendim, duke thënë se luftimet po vijojnë.
Plani i paqes i mbështetur nga SHBA-të propozon që Krimea, Luhansk dhe Donetsk të njihen “si de facto ruse, përfshirë edhe nga Shtetet e Bashkuara”. Kjo do të thoshte se Ukraina dhe vendet e tjera nuk do të kishin nevojë ta njihnin kontrollin rus me ligj.
Drafti gjithashtu sugjeron që në rajonet jugore të Khersonit dhe Zaporizhzisë, vijat e frontit do të ngriheshin dhe Rusia do të hiqte dorë nga zonat që ka pushtuar diku tjetër në Ukrainë – një referencë për rajonet verilindore të Kharkiv dhe Sumy, si dhe rajonin Mykolaiv në jug. Zelensky ka thënë më parë se lejimi i Moskës për të pushtuar tokën me forcë do të vendoste një precedent të rrezikshëm.
