Moti i keq ka shkaktuar probleme në disa qarqe të vendit. Në Lezhë, reshjet e dendura të shiut, që nisën pas mesnatës, shkaktuan probleme kryesisht në zonat urbane. Sistemi i kanalizimeve nuk ka arritur të përballojë sasinë e madhe të prurjeve, duke sjellë përmbytje në bllokun e banimit “11 Janari” në lagjen “Besëlidhja”.
Niveli i ujit ka arritur deri në 40 centimetra, duke bllokuar hyrjet e pallateve dhe duke vështirësuar ndjeshëm qarkullimin e këmbësorëve dhe automjeteve. Përmbytje raportohen edhe në aksin Lezhë-Shëngjin. Disa hektarë tokë bujqësore janë përmbytur për shkak se kanali i ujërave të larta në Zadrimë në zonën e Kallmetit ka dalë nga shtrati. Në pjesën më të madhe të territorit të Lezhës raportohet edhe mungesë e energjisë elektrike. Ekipet përkatëse po punojnë për normalizimin e situatës.
Problematike situata paraqitet edhe në Fushë-Krujë, kryesisht në fshatrat Bilaj, Murqinë dhe Mallkuc. Në Murqinë uji ka mbuluar sipërfaqe të mëdha arash. Shumica e kanaleve janë të vjetra dhe pa pastruar dhe nëse reshjet vazhdojnë me intensitet, përveç sipërfaqeve të tokës, mund të rrezikohen edhe banesa.
Në Vlorë, po ashtu era e fortë ka rrëzuar disa pemë në zonën e Skelës dhe Pyllin e Sodës.
