Kolegji Zgjedhor Gjyqësor ka vendosur regjistrimin e Gjergji Nikës si kandidat i pavarur për Kryetar Bashkie në Vlorë për zgjedhjet e pjesshme vendore të datës 9 nëntor 2025.
Më herët Komisionit Shtetëror të Zgjedhjeve rrëzoi kërkesën e tij për t’u regjistruar, por sot kolegji ka vendosur unanimisht se ai mund të marrë pjesë në garën zgjedhore.
“Fitore e drejtësisë mbi presionet politike! Sot, Kolegji Zgjedhor me vendim unanim 5–0 rrëzoi vendimet e KQZ-së dhe KAS-it, duke vulosur të drejtën time për të garuar si kandidat i pavarur në zgjedhjet e 9 Nëntorit 2025 për Bashkinë Vlorë.
Ky vendim vjen pas presioneve të shumta dhe përpjekjeve të hapura nga partitë e mëdha për të penguar një zë të pavarur në garë.
Por drejtësia foli qartë: askush nuk mund të ndalojë vullnetin e lirë të qytetarëve.
Kjo nuk është thjesht një fitore personale — është një fitore për çdo qytetar që nuk pranon të komandohet nga partite, por kërkon ndryshim, ndershmëri dhe zë të lirë për Vlorën.
Unë hyj në këtë garë me forcën e besimit tuaj dhe me vendosmërinë për ta kthyer politikën te njerëzit, jo te partitë”, reagoi ai pas vendimit.
