Planet për një takim midis Vladimir Putin dhe Donald Trump në Hungari, duket se dështuan dje.
Sipas mediave të huaja, megjithatë kryeministri i Hungarisë, Viktor Orban, ka thënë se qeveria e tij është ende duke u përgatitur për takimin në Budapest.
Kjo pasqyron edhe ‘ndjenjën’ në Moskë, ku këtë mëngjes u tha se përgatitjet janë ende në proces, edhe nëse do të duhet kohë.
“Ministri i Jashtëm hungarez Peter Szijjarto është në Uashington. Përgatitjet për samitin e paqes po vazhdojnë. Data është ende e pasigurt. Kur të vijë koha, ne do ta mbajmë atë”, shkroi Orban në rrjetet sociale.
Trump tha javën e kaluar se do të takohej së shpejti me Putinin në Hungari, por dje tha se nuk donte një “takim të kotë”.
Orban, i cili është prapa në shumicën e sondazheve përpara zgjedhjeve të vitit të ardhshëm, ka qenë një aleat i Trump prej kohësh dhe ka mbajtur marrëdhënie të ngrohta me Moskën.
