Kreu i PD, Sali Berisha ka sulmuar Gjykatën Kushtetuese një ditë pasi ajo bëri interpretimin final për kohëzgjatjen e mandatit të secilit gjyqtar, duke vlerësuar se mandati i Sonila Bejtjas përfundon këtë vit dhe jo në 2028 siç ajo pretendonte.
Në një konferencë nga selia blu, Berisha tha se Kushtetuesja dje shkelmoi ligjin e saj dhe opinionet e Komisionit të Venecias dhe shpalli ndërprerjen e mandatit të Bejtjas.
“Gjykata kushtetuese dje shkelmoi ligjin e saj. Vendosi të shkelmojë opinionet zyrtare të komisionit të Venecias dhe të shpallë jashtë çdo lloj kompetence ndërprerjen e mandatit të Bejtjas”, tha Berisha.
Berisha pretendon se mandati i saj përfundonte në 2028.
“Sonila Bejtja ka filluar detyrën në vitin 2020 jashtë cdo lloj dyshimi, përveç rrethit të kuq si armike e narko shtetit, asaj nuk mund të prekej mandati gjer në vitin 2028. Bejtja mori mandatin e Besnik Muçit dhe është zgjedhur për një vend që ishte vakant nga 2016. Por, sipas ligjit të Kushtetueses, sipas opinionit të Venecias, sipas vetë kushtetutës, mandati i saj nuk mund të ndërpritej. Gjykatësit kushtetues nuk kanë kushtetutë, presidenti ka xhepin dhe nuk ka kushtetutë, shteti shqiptar nuk është fyer dhe poshtëruar ndonjëherë në mënyrë të tillë. Ç’punë ka kushtetuesja të interpretojë për veten e vet dhe pse? Se i thotë Bajram Limioni. Bejtja ishte zë i pavarur. Zë që nderonte parimin themelor të një sistemi. Ata që mendojnë se këtu po bëhet avokati politike, gabojnë rëndë. Po bëhet avokati për kushtetutën”, tha Berisha.
