Mbeten ende të paqarta shkaqet e vrasjes së 44-vjeçarit Italian Edoardo Sarchi në zonën mes Salarisë dhe Nivicës. Të dhënat e deritanishme bëjnë me dije se në trupin e viktimës, në pjesën e këmbës është konstatuar një plagë plumbi, në arterien kryesore, çka mendohet se i ka sjellë edhe vdekjen për shkak të hemoragjisë. Gjithashtu bëhet me dije se 44-vjeçari është goditur me një mjet të fortë në kokë.
Edoardo Sarchi ndodhej për gjueti së bashku me ortakun e tij në kompaninë e prodhimit të tullave Eqerem Braçe dhe dy djemtë e tij, Daniel dhe Gazmend Braçe, si dhe me një person të katërt.
Bëhet me dije se Daniel, Gazmend dhe Eqerem Braçe janë marrë 4 herë në pyetje, fillimisht nga Oficerët e Policisë Gjyqësore, Prokuroria, Specialistët e Krimeve të Rënda e në fund përsëri nga OPGJ pasi këta persona kanë dhënë dëshmi kontradiktore me njëri-tjetrin.
Lajmi është pasqyruar gjerësisht në mediat italiane që bëjnë me dije se ngjarja po ndiqet edhe nga Ambasada Italiane në Tiranë.
