Vajzat nën moshën 14 vjeç së shpejti mund të ndalohen me ligj nga mbajtja e shamisë në shkollat austriake. Qeveria e koalicionit e Austrisë, e përbërë nga Partia Popullore Konservatore (OVP), Social- demokratët (SPO) dhe ”Neos”, parti liberale, e paraqiti sot masën para parlamentit.
“Shamitë për fëmijë kufizojnë dukshmërinë dhe lirinë e vajzave, kështu që ato janë qartazi një shenjë shtypjeje”, tha ministrja e Integrimit Claudia Plakolm. Janë planifikuar masa graduale për shkeljet e ndalimit. Së pari, administrata e shkollës do të flasë me nxënësen në fjalë dhe do të informojë prindërit e saj.
Nëse kjo nuk ndihmon, do të thirret autoriteti arsimor i vendit.
Si mjet i fundit, mund të vendosen gjoba midis 200-1 000 euro (235-1 175 dollarë) ose një dënim me burg për prindërit. Ligji duhet të miratohet ende nga parlamenti. Ende nuk është e qartë se si do të vlerësohet nga Gjykata Kushtetuese, e cila rrëzoi një ndalim të mëparshëm për shamitë në shkollat fillore në vitin 2020.
Gjyqtarët argumentuan se rregullorja synonte vetëm vajzat myslimane dhe jo të gjitha mbulesat fetare të kokës, të tilla si ato që vishen nga djemtë në fe të tjera.
”Ndalimi mund ta bëjë më të vështirë për vajzat myslimane aksesin në arsim dhe t’i margjinalizojë ato”, thanë ata.
Duke pasur parasysh këto shqetësime, qeveria këtë herë ka planifikuar masa shoqëruese për të fuqizuar vajzat.
Bashkësia Islame në Austri kritikoi planet e qeverisë si “politikë simbolike” dhe iu referua vendimit të mëparshëm kushtetues.
“Një përpjekje e ripërtërirë dobëson besimin në sundimin e ligjit dhe rrezikon kohezionin shoqëror. Në vend që të fuqizojë fëmijët, ata stigmatizohen dhe margjinalizohen”, tha ajo.
