“Besoj se Amerika e ka mbyllur me financimin e luftës në Ukrainë. Ne duam të arrijmë një zgjidhje paqësore për këtë çështje, duam të ndalim vrasjet”.
Kështu është shprehur zëvendëspresidenti i Shteteve të Bashkuara, J.D. Vance, në një intervistë të gjerë për Fox News.
Vance, i cili të shtunën u takua me zyrtarë të lartë europianë dhe ukrainas në rezidencën e ministrit të Jashtëm britanik për të diskutuar mënyrat e përfundimit të luftës, theksoi se Europa duhet të shpenzojë më shumë për Ukrainën.
“Ajo që u kemi thënë europianëve është e thjeshtë: Kjo është një çështje që ju prek ju, është te dera juaj. Duhet të dilni përpara dhe të merrni një rol më të madh. Dhe nëse ky konflikt ju intereson kaq shumë, duhet të jeni të gatshëm të kontribuoni më drejtpërdrejt dhe në mënyrë më të konsiderueshme për financimin e tij”, tha ai.
Zëvendëspresidenti amerikan hodhi poshtë gjithashtu kërkesat e liderëve europianë që presidenti ukrainas të marrë pjesë në samitin e ardhshëm mes SHBA-së dhe Rusisë, duke insistuar se “në këtë moment, nuk do të ishte produktive”.
Të shtunën, liderët europianë, përfshirë edhe Sir Keir Starmer, mirëpritën takimin e planifikuar për të premten në Alaska. Megjithatë, ata paralajmëruan se çdo bisedim duhet të përfshijë Ukrainën dhe të mos lejojë dorëzimin e asnjë territori në favor të Rusisë.
