Janë prezantuar nga ministri i Mbrotjes, Pirro Vengu 3 prioritetet për modernizimin e flotës ajrore shqiptare.
Në një takim të mbajtur në Bazën Ajrore të Farkës, në kuadër të Rivlerësimit Strategjik të Mbrojtjes, ministri ka bërë me dije se do të modernizohen sistemet e mbrojtjes kundërajrore, do të investohet në infrastrukturën e bazave ajrore, e deri te rihapja e shkollës së aviacionit në Vlorë.
Postimi i ministrit të Mbrojtjes, Pirro Vengu:
Në Bazën Ajrore të Farkës ku vijon puna për Rivlerësimin Strategjik të Mbrojtjes (RSM) me fokus investimet në modernizim, vlefshmërinë ajrore sipas standarteve të NATO-s dhe arritjen e objektivave të vendosura në Samitin e Hagës.
Tre prioritetet tona kryesore:
Modernizimi i flotës, pajisjeve, teknologjisë dhe armatimit, që nga meteorologjia deri tek sistemet e mbrojtjes kundërajrore.
Zhvillimi i infrastrukturës në bazat ajrore në Gjadër, Rinas, Farkë, Kuçovë dhe Vlorë, për të rritur sigurinë dhe efektivitetin e Forcës Ajrore në misione ushtarake dhe të mbrojtjes civile.
Zhvillimi dhe specializimi i burimeve njerëzore me:
– Rihapjen e Shkollës së Aviacionit në Vlorë;
– Trajnimin e gjeneratës së re të pilotëve, teknikëve të bordit, kontrollorëve dhe ekspertëve të sistemeve pa pilot.
Të gjitha këto mbështetur në, infrastrukturë të re, rritje të trajtimit financiar dhe promovim të karrierës ushtarake për të rinjtë shqiptarë.
Vijon puna me të gjitha komandat, strukturat operacionale dhe partnerët ndërkombëtarë, për të ndërtuar një Forcë Ajrore moderne, efikase dhe të përgatitur për sfidat e së ardhmes.
