Gledis Nano është paraqitur këtë të hënë, 28 korrik, në ambientet e Prokurorisë së Posaçme, (SPAK), për fazën e radhës të garës për drejtuesin e ri të Byrosë Kombëtare të Hetimit (BKH). Në këtë fazë, kandidatët në garë i nënshtrohen testit të poligrafit dhe intervistës në panel, e cila ndiqet nga faza e verifikimit të figurës dhe deklarimit të pasurisë nga Komisioni i Verifikimit të Pasurisë dhe Figurës.
Më 22 korrik u zhvillua faza e tretë e garës, ku shtatë kandidatët iu nënshtruan një provimi me shkrim dhe testit për arsyetimin logjik.
Ndërsa më datë 10 korrik, kandidatët për kreun e BKH-së iu nënshtruan testimeve fizike.
Kujtojmë se kandidatët në garë për këtë institucion, i njohur ndryshe si FBI-ja shqiptare, janë: Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta.
Si zhvillohet procedura për zgjedhjen e kreut të BKH-së
Sipas rregullores, ndiqen 6 hapa për emërimin e kreut të BKH-së, të cilat janë: verifikimi i aplikimit, vizita mjekësore dhe testi për aftësitë fizike, ese me shkrim dhe test për arsyetim logjik, testi i poligrafit dhe intervista në panel, verifikimi i figurës dhe pasurisë, identifikimi i kandidatit fitues, trajnimi dhe emërimi.
Tek pika e fundit parashikohet edhe përzgjedhja e katër kandidatëve më potencialë, që i dërgohen drejtuesit të SPAK. Altin Dumani do të bëjë përzgjedhjen përfundimtare dhe emri i kandidatit të përzgjedhur i paraqitet Këshillit të Lartë të Prokurorisë për miratimin e mandatit 5-vjeçar. Aktualisht, Byroja Kombëtare e Hetimit drejtohet nga Aida Hajnaj, e cila e përfundon mandatin më 31 gusht. Ajo nuk arriti të dorëzonte dokumentacionin brenda afatit të aplikimit./tvklan.al
