Sezoni veror dhe fluksi i lartë i lëvizjes së mjeteve dhe turistëve ka sjellë një rritje të rasteve të paraqitura pranë urgjencës së traumës në kryeqytet.
Shefja e shërbimit të reanimacionit, Rexhina Sturçe, thotë se në këtë periduhë kemi afro 20 % më shumë raste.
“Traumat rriten afërsisht me 20-25 % të rasteve të paraqitura gjatë ditës në krahasim me periudhën e tjetër të vitit. Gjatë 24 orëve paraqiten në urgjencën e traumës 180 raste”, u shpreh Sturçe.
Aksidentet automobilistike dhe ato ujore përbëjnë numrin më të lartë të urgjencave.
“Përqindjen më të lartë të traumave e zënë aksidentet rrugore. Kohët e fundit janë rritur dhe aksidentet me monopatina, si dhe traumat e ujit që ndodhin nga zhytja me kokë në det, por edhe aksidentet e përplasjes së mjeteve të ujit”, shtoi ajo.
Afro 40 % e rasteve gjatë 24 orëve përfundojnë në nderhyrje kirurgjikale.
“Rastet më emergjente i nënshtrohen ndërhyrjes kirurgjikale në sallat e urgjencës, 8 -10 % e rasteve, një përqindje tjetër e rasteve operohen ditët në vijim, që mund të shkojnë 30-40 % e rasteve”, tha ajo.
Problem janë format e rënda të traumave.
“Dëmtimet më të shpeshta janë frakturat e ekstremiteteve, por format më të rënda janë frakturat dhe traumat e kokës, apo abdomenit”, shtoi më tej Sturçe.
Grupmosha e përfshirë më shumë në aksidente rrugore dhe ato ujore që paraqiten në urgjencën e traumës, sipas shefes së reanimacionit është ajo 18-40 vjec.
Tv Klan
