Bosi famëkeq i drogës, dhe kreu i kartelit të Medellín, Pablo Escobar, u vra më 2 dhjetor 1993 në qytetin Medellín, në Kolumbi, një ditë pasi kishte festuar 44-vjetorin e tij.
Emisioni “Opinion” në Tv Klan, mbrëmjen e sotme, është ndalur në historinë si dhe vrasjen e tij.
Gazetarja, Fatjona Mejdini ka sjellë në vëmendje operacionin për lokalizmin dhe më pas ekzekutimin e tij.
Ka qenë një telefonatë me djalin e tij, ajo që bëri të mundur lokalizimin nga policia të vendndodhjes së saktë dhe më pas ekzekutimin e tij në tentativën për tu arratisur përmes çatisë.
“Akti që zbuloi praninë e Escobar në lagje ishte ditëlindja e tij. Në 1 dhjetor të 1993, Escobar mbushi 44 vjeç dhe në ato momente ai telefonoi djalin e tij. Sinjali telefonik për të telefonuar djalin dha lokacionin. Kishte shumë angazhim dhe kjo telefonatë i dha policisë vendndodhjen ekzakte ku ai ndodhej dhe në datën 2 dhjetor të ’93, Escobar, shtëpia dhe lagja u rrethua dhe ai u përpoq të arratisej përmes çatisë, por sigurisht u ekzekutua në vend. Dita e vrasjes është futur në historinë e qytetit të Medelinit. Edhe sot e kësaj dite gjithë qyteti i Medelinit është duke vuajtur trashëgiminë kriminale të Pablo Escobar”, theksoi gazetarja.
