Ndahet nga jeta në moshën 82-vjeçare ish-ambasadori gjerman në Shqipëri, Werner Daum. Diplomati u gjet i pajetë në dhomën e hotelit në Kavajë ku po qëndronte prej disa ditësh në Shqipëri, vend të cilin e deshi fort.
“Rreth orës 12:30, në Golem, në një dhomë hoteli, është gjetur pa shenja jete shtetasi W. D, 82 vjeç (ish-ambasadori gjerman). Nga këqyrja paraprake, nuk janë konstatuar shenja dhune. Dyshohet se vdekja ka ardhur për shkaqe natyrale. Grupi hetimor ndodhet në vendngjarje dhe po vijon punën për zbardhjen e plotë të rrethanave të rastit”, ka bërë me dije Policia mesditën e sotme.
Vetëm para pak ditësh, ish-ambasadori Daum mori pjesë në Kavajë në inaugurimin e shtatores së dëshmorit të demokracisë, Josif Budo. Ai vetë u nderua me një Certifikatë Mirënjohjeje nga kryebashkiaku Fisnik Qosja, për kontributin e tij në momentet historike të vitit 1990.
Pas ceremonisë, Daum foli për lidhjen e tij të veçantë me Shqipërinë dhe se sa shumë e deshi këtë vend.
“E dua Shqipërinë, e dua këtë vend, natyrën e tij të mrekullueshme, malet, detin, veçanërisht vendet historike, kishat bizantine, qytete si Berati, Korça, Shkodra, Vlora, dhe më duhet të them se i doja shumë shqiptarët. Pas largimit tim nga Shqipëria, vendosa të sillja Shqipërinë më afër popullit gjerman. Isha diplomat, por gjithashtu edhe profesor universiteti dhe kurator në një muze të madh gjerman“, shprehej ish-ambasadori më 10 korrik.
Gjatë viteve 1987-1990, Werner Daum ishte ambasador në Tiranë dhe njihet për rolin e tij të veçantë, duke hapur dyert e ambasadës gjermane për shqiptarët kundër urdhrave të qeverisë së tij, me bindjen se kjo do të ndihmonte në rrëzimin e regjimit komunist. /tvklan.al
