Pas thuajse 48 orësh kërkimesh, është gjetur trupi i pajetë i kapitenit të anijes turistike, Arben Anamali.
Sipas asaj që bën të ditur gazetarja e Klan News, Emi Kalaja, trupi u gjet gjatë ditës së tretë të operacionit të kërkimit, që nisi rreth orës 05:00 të mëngjesit të sotëm. Kujtojmë se ngjarja tragjike ndodhi pasditen e të martës, më 8 korrik, në liqenin e Shkodrës, teksa kapiteni i anijes tentoi të shpëtonte dy turistë që kishin rënë në ujë, por nuk ja doli të shpëtojë vetë.
Fatmirësisht nga ngjarja kanë shpëtuar dy turistët, të cilët ndodhen në gjendje të mirë shëndetësore. Për ngjarjen ka reaguar edhe presidenti, Bajram Begaj, i cili nderoi aktin heroik të shpëtimit të dy turistëve nga mbytja
“Dëshmoi një model shoqëror dhe shpirt heroik. Jam pranë familjarëve të tij në këto momente të vështira dhimbjeje”, shkroi presidenti në rrjetet sociale.
Anamali ishte babai i dy fëmijëve të mitur dhe prej vitit të kaluar ishte emëruar kapiten i anijeve turistike në pronësi të Bashkisë Shkodër. Fatkeqësisht, ky akt heroik u kthye në një tragjedi për të, për familjen dhe për të gjithë ata që e njohën.
