Me armë në sfond, pengje të gjunjëzuar dhe batuta të errëta, një video që ngjan me propagandën e ISIS po qarkullon në rrjetet sociale për të “reklamuar” Afganistanin si destinacion turistik.
Në klipin që po bën xhiron e internetit, një burrë afgan me pushkë dhe turban shfaqet përballë kamerës duke thënë: “Kemi një mesazh për Amerikën”, përpara se një i ri perëndimor të buzëqeshë dhe të thërrasë: “Mirë se vini në Afganistan!”.
Pamjet satirike përfshijnë stërvitje fizike në një tank të shkatërruar, zhytje në liqene me kallashnikov në shpinë, dhe darka “tradicionale” me turistë të veshur me rroba afgane. Ndërkohë, në sfond dallohet një armë amerikane me mbishkrimin “Pronë e qeverisë së SHBA-së”.
Videoja nuk është publikuar nga ndonjë kanal zyrtar i lidhur me talebanët, por përputhet me një strategji të vazhdueshme të regjimit për të përmirësuar imazhin e vendit përmes rrjeteve sociale dhe influencuesve të huaj.
Pas ardhjes në pushtet më 15 gusht 2021, regjimi taleban ka ndaluar pjesëmarrjen e grave në arsim, punë dhe jetën publike, duke u përmbajtur një interpretimi ekstrem të ligjit islam.
Ndër emrat e përfshirë në këtë fushatë “turistike” është edhe ylli amerikan i filmave për të rritur, Whitney Wright, e cila në mars publikoi në Instagram përvojat e saj në muze, xhami dhe salla dasmash në Afganistan.
Në rrjet kanë qarkulluar gjithashtu videot e blogeres amerikane Marian Abdi dhe youtuberit britanik Miles Routledge, të cilët kanë reklamuar “mikpritjen” afgane – duke anashkaluar shkeljet e rënda të të drejtave të njeriut.
Sipas OKB-së, 84% e popullsisë jeton nën kufirin e varfërisë, ndërsa organizata “Emergency” thekson se 3 në 5 afganë nuk kanë akses as në shërbimet më bazike shëndetësore. SHBA dhe Britania e Madhe paralajmërojnë qytetarët e tyre të mos udhëtojnë në Afganistan për shkak të rrezikut të lartë për terrorizëm, rrëmbime dhe trazira.
Por talebanët duket se po provojnë një tjetër rrugë: atë të TikTok-ut dhe “glamour-it” propagandistik.
