Mbrëmjen e sotme, Egnatia do të luajë aktin e parë të raundit kualifikues të Champions League. Rrogozhinasit presin në shtëpi Breidablik, një kundërshtar që për trajnerin, Edlir Tetova ka cilësi, por eksperienca e kampionëve të Shqipërisë në nivele të tilla do bëjë diferencën në fushë.
“S’ka ekip modest në Champions League, pasi është Champions League. Sigurisht, marrin pjesë më të mirat. Mendoj se përgatitjet kanë shkuar shumë mirë. Them shumë mirë për faktin se në përgatitje gjithmonë nuk duhet të ketë lëndime. Ne lëndime nuk kemi pasur”, tha Edlir Tetova, trajner i Egnatias.
Dy fitoret në testet miqësore kanë rritur entuziasmin në kampin rrogozhinas.
“Përballemi me një kundërshtar, po themi njësoj me ne. Të paktën për nga ajo se çfarë unë me stafin kemi parë. Mendoj se vetëm ritmi i atyre ndeshjeve bën diferencën”, shtoi Tetova.
Për përballjen e orës 21, Egnatia do të ketë grupin e plotë të futbollistëve. Në këtë mënyrë, tekniku Tetova do bëj zgjedhjet më të mira për një rezultat pozitiv dhe hedhjen e një hapi të madh drejt turit të dytë kualifikues të kompeticionit. Klan News
