Një aksident është regjistruar pas mesnate në aksin rrugor Lezhë–Shkodër, pranë kryqëzimit të parë në hyrje të qytetit të Lezhës.
Ngjarja ka ndodhur rreth orës 01:00, kur një automjet i firmës së pastrimit të mbetjeve urbane është përplasur me një taksi. Si pasojë e përplasjes, drejtuesi i taksisë mbeti i bllokuar brenda automjetit për disa minuta.
Sipas burimeve nga vendngjarja, taksisti është transportuar me urgjencë në gjendje të rëndë drejt Spitalit të Traumës në Tiranë.
Në vendngjarje kanë mbërritur menjëherë forcat e policisë, të cilat po mbledhin prova për të përcaktuar rrethanat dhe shkaqet e aksidentit./tvklan.al
