13 nga 14 doganierët grekë të Qafë Botës të akuzuar për krijimin një organizate kriminale, të cilët merrnin ryshfete në mënyrë të përsëritur janë dërguar në paraburgim.
Deponimet e tyre pranë prokurorit dhe gjyqtarit hetues të Igoumenitsës nisën mëngjesin e së dielës dhe procedura zgjati pothuajse njëzet orë, ndërsa vendimi për paraburgim u bë i njohur sot në orët e para të mëngjesit
Brenda ditës pritet që ata të transferohen në burgje të ndryshme të vendit. Doganierët u arrestuan pas një operacioni të befasishëm nga Shërbimi i Çështjeve të Brendshme të policisë greke, pasi kishin qenë nën vëzhgim për më shumë se dy muaj. Në dosje përfshihet një numër i madh përgjimesh telefonike si dhe materiale filmike.
13 punonjësit e doganës bashkë me shefin e tyre kërkonin dhe merrnin rryshfete për të mos kryer kontrolle ndaj automjeteve që kalonin kufirin ose për të mos regjistruar shkelje doganore. Vetëm një punonjëse, sepse ishte e re në shërbim, nuk ishte përfshirë ende në skemë. Sipas dialogëve të përgjuar, ekzistonte edhe një listë çmimesh si psh. për autobusët 10 euron për çdo kalim, ndërsa për makinat private 5-200 euro.
Të akuzuarit vendosnin paratë e ligjshme që paguanin drejtuesit në një kuti dhe ato të ryshfeteve në fund të saj e me pas i ndanin. Në dialogët e regjistruar që u publikuan orët e fundit në shtypin grek dëgjohen doganierë që kërcënojnë një drejtues mjeti nga Shqipëria me gjobë 3000 euro dhe sekuestrim të automjetit, duke i kërkuar 150 euro për ta lënë të kalojë:
Vetëm brenda 15 ditësh ata morën të paktën 450 ryshfete me përfitim mbi 7,000 euro. Gjatë arrestimit u sekuestruan gjithsej 88,000 euro cash, 10 monedha ari, 2 pistoleta dhe tableta narkotikësh. Akuzat që rëndojnë ndaj tyre janë pjesëmarrje në organizatë kriminale,marrje dhe dhënie ryshfeti,keqpërdorim detyre, shantazh, shkelje të Kodit Kombëtar Doganor,shkelje të ligjit për armët. Sipas mediave greke dosja me mbi 2000 faqe përfshin dhjetëra persona të tjerë, nga të cilët ka shumë të identifikuar. Hetimet vazhdojnë dhe ndoshta do të ketë edhe arrestime të reja.
