Presidenti Donald Trump, i cili ka promovuar atlete, kitara, monedha dhe orë të markës Trump, ka lançuar parfumin nën emrin e tij. Produkti i fundit që mban emrin e presidentit kushton 249 dollarë. Me statujë të artë “ikonike” që simbolizon Trump, e disponueshme si për burra ashtu edhe për gra, reklamohet si shprehje e “besimit, bukurisë dhe vendosmërisë së pandalshme”.
Aroma, e quajtur “Victory 45-47”, lidhet me “Fitoren, Forcën dhe Suksesin”.
“Blej një shishe për vete dhe mos harro të blesh një edhe për të dashurit e tu. Shijoje, argëtohu dhe vazhdo të fitosh!” shkroi Trump në rrjetin e tij social.
Më herët, Trump promovoi një koleksion parfumesh me emrin “Fight! Fight! Fight!”, i lançuar në dhjetor, me çmim 199 dollarë. Një qytetare komentoi në internet në lidhje me lançimin e parfumit, duke iu referuar miratimit në Senat të projektligjit “One Big Beautiful” që shkurton drejtpërdrejt 128 miliardë dollarë fonde shtetërore për Programin për Ushqyerjen (SNAP) dhe gati 880 miliardë dollarë për Medicaid, gjë që mund t’i privojë më shumë se 10 milionë amerikanë nga sigurimi shëndetësor.
“16 milionë amerikanë janë gati të humbasin kujdesin shëndetësor, por shkoni dhe blini parfumin tim të shëmtuar…” shkruajti një ndjekëse në platformën X.
Dikush tjetër në këtë platformë komentoi: “Është aq e turpshme sa nuk ka fjalë për ta përshkruar.”
“Më vjen keq, por është shumë e vështirë të mbash një mendim të lartë për këdo. Ai e turpëron vendin dhe i bën mbështetësit e tij të duken si budallenj çdo ditë,” komentoi një tjetër person.
Sipas një raporti të publikuar në qershor, presidenti amerikan fitoi 2.5 milionë dollarë vitin e kaluar nga shitja e atleteve dhe parfumëve.
Produktet e reja i bashkohen një liste të artikujve me markën Trump, që përfshin Biblën “God Bless the USA” me çmim 69.99 dollarë dhe çizmet “Trump Landslide” me çmim 299 dollarë. Klan News
