Niveli i kripës në ujërat e lagunës së Karavastasë është rritur shumë, duke rrezikuar jetën e gjallesave që jetojnë aty. Sasia e kripës që ajo mbart është më e lartë se uji i detit. E gjitha kjo ka ardhur për shkak të mungesës së qarkullimit të ujërave det–lagunë.
Për këtë qëllim, Bashkia Divjakë është pajisur me një mjet eskavator amfib, i vetmi në rajonin tonë, i cili po punon për hapjen e kanalit dhe thellimin e tij. Kryebashkiaku Josif Gorrea shprehet se komunikimi i ujërave të detit me lagunën është jetësor për ekosistemin.
“Komunikimi i detit me lagunën është jetësor për të freskuar ujërat. Në këto ditë që po flasim, niveli i kripërave është rritur mjaft, është shumë më i lartë nga i detit, prandaj komunikimi, freskimi i ujit është jetësor për ngjalën, për të gjitha gjallesat edhe për pelikanin,” tha kryetari i Bashkisë së Divjakës, Josif Gorrea.
Ndërhyrja për hapjen dhe thellimin e ujërave që lidhin lagunën dhe detin në Divjakë ishte emergjente. Bllokimi i këtij komunikimi po rrezikonte zhdukjen e ngjalës dhe disa peshqve që gjenden vetëm në lagunën e Karavastasë. Bashkia është në bisedime me qeverinë shqiptare për të siguruar fonde që puna për mirëmbajtjen e kanaleve të ujërave detare të shtrihet gjatë gjithë vitit, pasi kërkohen fonde të shumta të cilat vetë bashkia nuk i ka.
“Ne jemi duke zhvilluar përsëri një projekt më madhor dhe ky komunikim, ky kanal të jetë i normave të lejuara brenda ambientit, pa prishur ambientin, po gjithsesi duke ruajtur komunikimin e ujërave me detin,” tha Gorrea.
Laguna e Karavastasë është habitati natyror i pacënuar nga dora e njeriut. Mbijetesa e gjallesave që rriten aty kërkon qarkullim të vazhdueshëm të ujit me detin, ndryshe rrezikohet ekzistenca e tyre.
Për herë të parë, një eskavator i tillë, i cili arrin të largojë rërën në thellësi të mëdha, është futur në punë prej një muaji, sepse komunikimi i lagunës me detin është jetësor për ekosistemin. Klan News
