“Ndërsa plazhet janë të mbushura me pushues, punonjësit e ndihmës dhe të shërbimit janë ata që mbajnë turizmin në këmbë. Por pas vrullit dhe ngarkesës së sezonit veror, një pjesë e tyre mbeten pa punë”, raporton gazetarja Dorina Halili.
Artan Tanushi është një prej shumë punonjësve sezonalë në turizëm. Prej 6 vitesh punon si kamarier gjatë verës, ndërsa në muajt e tjerë të vitit detyrohet të shkojë për punë jashtë Shqipërisë.
Ajo që shpesh bën diferencën për një kamarier janë bakshishet, të cilat gjatë muajve të sezonit ka raste që e kalojnë edhe rrogën bazë. Paga e referencës për një kamarier në Shqipëri është përcaktuar nga Tatimet 70 mijë lekë, ndërsa në realitet varion nga 40 mijë në 70 mijë. Ka raste edhe deri në 100 mijë lekë, duke u barazuar kështu me Greqinë.
Sezonaliteti në turizëm sjell pasiguri te punonjësit, por edhe vetë bizneset që çdo vit përballen me mungesën e fuqisë punëtore të kualifikuar. Ndaj operatorët turistikë dhe ekspertët e hotelerisë dhe turizmit e shohin si zgjidhje mbështetjen financiare edhe përtej muajve të verës.
Ndryshe nga Shqipëria, vende si Greqia, Italia apo Spanja kanë struktura të qëndrueshme pune për sektorin e shërbimeve. Në Greqi një pjesë e punonjësve përfitojnë pagesa edhe jashtë sezonit.
Ministria e Turizmit e ka parashikuar mbështetjen financiare për punonjësit sezonalë në strategjinë 2024-2030, por ende nuk ka një nismë ligjore.
Tv Klan
