Pasuritë e një shtetasi, i cili është dënuar në Itali për veprën penale “shfrytëzim prostitucioni”, janë konfiskuar me kërkesë të Prokurorisë së Elbasanit.
Në njoftimin e organit të akuzës, bëhet me dije se janë konfiskuar 11 automjete të ndryshme, 1 apartament në Durrës, një motomjet, si dhe një biznes të shitjes dhe dhënies me qira të automjeteve.
Arsyeja e konfiskimit të këtyre pasurive bëhet pasi është provuar që ato janë përfshirë në shitblerje të përsëritura për të legjitimuar të ardhurat financiare nga veprimtaritë kriminale të tij.
Njoftimi i Prokurorisë Elbasan
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Elbasan, u konfiskuan 14 pasuri të shtetasit M.A., i dënuar për veprën penale “Pastrimi i produkteve të veprës penale ose veprimtarisë kriminale”, parashikuar nga neni 287/1 i Kodit Penal.
Nga gjykimi në kuadër të procedimit penal nr.808, të vitit 2017, u arrit të provohej se ky shtetas ka kryer veprimtari kriminale në Itali, ku autoritetet gjyqësore të Torinos e kanë deklaruar fajtor dhe ku është dënuar për veprën penale të shfrytëzimit të prostitucionit.
Aktet e ardhura nëpërmjet kërkesës për ndihmë juridike nga autoritetet italiane të drejtësisë, provuan faktin e dënimit të formës së prerë të të pandehurit në Itali dhe përfitimin e të ardhurave nga kjo veprimtari e paligjshme. Nga gjykimi u evidentuan transaksione të shpeshta financiare të kryera nga ushtrueset e prostitucionit në drejtim të të pandehurit apo familjarëve të tij, si dhe u provua se të ardhurat e paligjshme pastroheshin për t’u dukur si të ligjshme nga i pandehuri nëpërmjet investimit në pasuri të paluajtshme dhe të luajtshme.
Pasuritë e blera janë përfshirë në shitblerje të përsëritura, duke krijuar një zinxhir të rremë transaksionesh për të legjitimuar të ardhurat. Kjo veprimtari/pastrim është kryer nga i pandehuri jo vetëm si individ por edhe nëpërmjet aktivitetit ekonomik që ai ka hapur si person fizik në shitblerje-dhënie me qira automjetesh.
Në përfundim të gjykimit, me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Elbasan u konfiskuan pasuritë e mëposhtme:
– Apartament në qytetin e Durrësit;
– Automjet Mercedes Benc;
– Automjet Suzuki Grand Vitara;
– Automjet Volkswagen;
– Automjet JEPP;
– Automjet Fiat Marea;
– Automjet Maserati;
– Automjet BMV;
– Automjet Mercedes Benc;
– Automjet Audi SQ7;
– Automjet Volkswagen:
– Automjet Volkswagen;.
– Motomjet Motor BMV; dhe
– Aktivitet tregtar me fushë të veprimtarisë Tregti automjetesh dhe dhënie mjetesh me qira, në qytetin e Elbasanit.
Prokuroria pranë Gjykatës së Shkallës së Parë Juridiksionit të Përgjithshëm Elbasan, mbetet gjithmonë e angazhuar në përmbushjen e detyrimit të saj për dënimin e personave që kryejnë veprën penale të pastrimit të parave dhe konfiskimin e pasurive me prejardhje nga veprimtaria kriminale.
