“E Diela Ndryshe” është drejtuar për në fshatin Bllatë e Poshtme në Dibër, në të cilin dy vite më parë ndodhi një tragjedi. Një baba humbi jetën në një aksident duke lënë pas 7 fëmijë dhe bashkëshorten. Arbër Hajdari i tregon drejtuesit të programit “E Diela Shqiptare” në Tv Klan, Ardit Gjebreas, dinamikën e këtij rasti dhe problematikat që u paraqitën.
Arbër Hajdari: Ky ka qenë një rast vërtet tragjik. Ka qenë tragjik për shkak të mënyrës sesi ndodhi dhe duke lënë pas përveç varfërisë, 7 fëmijë jetimë. 7 engjëj ku më i madhi prej tyre ishte 10 vjeç, nëna ishte shtatzënë, nuk kishin një strehë dhe kjo e bënte rastin akoma më tragjik. Kryefamiljari la pas vetëm një tokë, pa shtëpi dhe familja mbeti mes katër rrugëve. Jetonin me qira këtu, jetonin në kushte të vështira dhe menjëherë pas saj, “Fundjavë Ndryshe” nisi përpjekjet për t’u siguruar aty një shtëpi, një strehë të re për këto 7 engjëj që ngelën në mëshirë të fatit. Nuk vonoi shumë dhe erdhi përgjigjja pozitive nga një donator i cili mori përsipër ndërtimin e shtëpisë.
Themeluesi i fondacionit “Fundjavë Ndryshe, rikthehet në ditët pas ngjarjes duke ndarë përjetimin e vështirë ku nga një anë familja përballej me humbjen dhe nga tjetra, me varfërinë.
Arbër Hajdari: Unë kam qenë në dimër këtu dhe ky ka qenë një territor komplet i mbushur me borë. Ditën kur kam ardhur këtu dhe e kam parë, kam takuar familjen nga afër, ka qenë një nga ato momentet goditës në trurin tim. Ndërkohë që qanin të atin, nga krahu tjetër kishin datën për të paguar qiranë aty dhe u gjenda në një vështirësi shumë të madhe emocionale. Fëmijët njëri më i vogël se tjetri, zonja shtatzënë…
Gruaja quhet Yllka, ndërsa i ndjeri Bedri. Emri i tij iu vendos djalit që erdhi në jetë.
Rrjeti i donatorëve të “Fundjavë Ndryshe” është gjithnjë i informuar për rastet. Ata jo gjithnjë duan të jenë publikë, një raport që sipas Hajdarit, ndahet në 50:50, por janë gjithnjë të gatshëm për të ndihmuar. Donatori që ka mundësuar ndërtimin e shtëpisë së Yllkës, përveçse nuk ka preferuar të bëhet publik, i ka ndjekur punimet në mënyrë të veçantë.
Arbër Hajdari: Bamirësi i këtij rasti është shqiptar që jeton jashtë vendit. Është rritur në emigrim për një kohë të gjatë, ka vuajtur gjatë jetës së tij ashtu si shumë shqiptarë dhe tani ka krijuar biznesin e tij i cili ka ecur mirë. Kur e kam lajëmruar për këtë rast dhe kemi filluar punimet, çfarë ishte një gjë që mua më ka ngelur në mendje ishte që ai vinte këtu, natën për të parë progresin e ndërtimit të shtëpisë.
Ardit Gjebrea: Pa takuar familjen?
Arbër Hajdari: Pa takuar as familjen, pa na lajmëruar as neve. Vinte për të marrë kënaëqsinë, natën që mos ta shikonte askush, vinte, shikonte shtëpinë dhe ikte.
Ardit Gjebrea: Po si e morët vesh ju?
Arbër Hajdari: Të nesërmen na ka lajmëruar që e kam parë shtëpinë, po ecën mirë etj.
Historia e dashurisë që lindi nga telefonata e gabuar! Yllka kthehet te kujtimet me bashkëshortin e ndjerë
Dy vite më parë, në fshatin Bllatë e Poshtme në Dibër, një aksident i mori jetën babait të 7 fëmijëve, të cilët mes dhimbjes, përballeshin edhe me varfërinë. Rasti u identifikua nga “Fundjavë Ndryshe” që menjëherë iu gjend pranë familjes dhe një bamirës u ofrua të ndërtonte shtëpinë.
Shtëpia kishte qenë gjithnjë ëndërr e të ndjerit, Bedriut, i cili kishte arritur t’i linte familjes vetëm një copë tokë. “E Diela Ndryshe” shkon në shtëpinë ku aktualisht banon e veja, Yllka me 7 fëmijët, për t’i çuar drejt banesës së re. Yllka nis të ndajë me rubrikën e së “Dielës Shqiptare” në Tv Klan, kujtimet e lumtura me bashkëshortin e ndjerë.
Ardit Gjebrea: Si u dashurove me Bedriun?
Yllka: Me telefon jemi njohur.
Ardit Gjebrea: Me telefon? Si?
Yllka: Ka qenë nata e Vitit të Ri. I ra gabimisht…
Ardit Gjebrea: I ra gabimisht dhe pastaj filluat të flisni…
Yllka: Po.
Ardit Gjebrea: Ju pëlqeu biseda.
Yllka: Kisha pak kështu, por…
Ardit Gjebrea: Kishe pak turp në fillim.
Yllka: Në fillim po.
Ardit Gjebrea: Pastaj?
Yllka: Pastaj vendosëm të fejoheshim.
Ardit Gjebrea: U fejuat, pas sa kohësh?
Yllka: Pas 3 muajsh.
Ardit Gjebrea: Pastaj vendosët që të martoheshit?
Yllka: Po, brenda një muaji.
Yllka e përshkruan të shoqin si një njeri shumë të qetë. Ajo tregon edhe për ditën kur ai humbi jetën nga një pllakë mermeri që i ra në kraharor.
Yllka: Ne ishim këtu, prisja fëmijët të vinin nga shkolla se vinin në orën 2. Vetëm kur më kanë marrë nga qendra shëndetësore Maqellarë që thonë merr kunatin, hajde se është Bedriu paqejf, por nuk më treguan se…
Ardit Gjebrea: Nuk treguan për aksidentin, vetëm thanë është paqejf.
Yllka: Po.
Ardit Gjebrea: S’të shkoi mendja për keq.
Yllka: Mendja më shkoi, por thashë do të ketë vrarë ndonjë gisht…
Ardit Gjebrea: Ai punonte ekzaktësisht ku?
Yllka: Në pllaka mermeri.
Ardit Gjebrea: Atë ditë kur iku në mëngjes, e takove, e përqafove, çfarë të tha?
Yllka: Jo se ishte pak i lodhur nga rruga që kishte lëvizur dy ditë para në shtëpi dhe ndërroi dy furgonë atë ditë.
Ardit Gjebrea: Ti ishe shtatzënë ndërkohë?
Yllka: Po, shtatzënë.
Ardit Gjebrea: Në çfarë muaji?
Yllka: Në të nëntin.
Ardit Gjebrea: Kush ta tha lajmin?
Yllka: Kunati i vogël, Yllka. Tha bëhu e fortë se na ke edhe neve në krah si vëllezërit e tu, prindërit e tij, kunatat.
Ardit Gjebrea: Si ndodhi aksidenti?
Yllka: Një pllakë mermeri i ka rënë në zemër dhe i ka thyer tri brinjë.
/tvklan.al
