Në konferencë për mediat nga Selia Blu, Sali Berisha denoncoi sot atë që e quan manipulim të votave në diasporë. Sipas kryedemokratit ajo që ndodhi “është e paprecedentë”.
“Shqipëria kishte mbetur i vetmi vend në të cilin njëlloj si në ditët më të zeza të komunizmit, shqiptarëve jashtë vendit nuk u lejohej të votonin, pavarësisht se në Kushtetutë dhe dokumente zyrtare kishin të drejtën e votës dhe ishin të listuar në listat e votimit”, tha Berisha.
Kreu i PD solli disa video për të dëshmuar sipas tij, se “si nëpërmjet mekanizmave korruptive Rama e shtetëzoi procesin e votimit dhe realizoi manipulimin më të madh”.
“Dokumente të pakundërshtueshme faktojnë krimin e shëmtuar kushtetues elektoral të Edi Ramës, manipulimin e tij ekstrem, shtetëzimin e procesit të votimit të diasporës nëpërmjet akteve më madhore korruptive të njohura ndonjëherë. Shtetëzimi dhe manipulimi i votës së shumicës së shqiptarëve që jetojnë jashtë vendit, që kësaj here me një përfaqësi prej 340 mijë vetësh zgjodhën të votojnë, është një goditje e rëndë e idealeve të lirisë së shqiptarëve, e përpjekjeve të tyre madhore për të qenë së bashku, pavarësisht se ku jetojnë, për të gëzuar të drejtat kushtetuese të vendit të origjinës. Ky manipulim është i paprecedent në historinë e votimeve të diasporës”, tha Berisha.
Ai ftoi qytetarët shqiptarë që votuan të përgatiten “për një luftë pa kompromis kundër këtij narkoshteti” si një ndëshkim për atë që Berisha e quan “farsë zgjedhore”.
