54 deputetët e rinj të Partisë Socialiste, të dalë nga zgjedhjet e 11 majit, nisin sot zyrtarisht “shkollën verore”. Ata do të marrin leksione për një muaj në akademi. 19 prej tyre nuk kanë pasur asnjë funksion publik më herët, qoftë në nivel bashkie, ministrash, që nuk i kanë bërë të njihen më shumë me jetën publike. Një prej lektorëve ka qenë edhe kryeministri Edi Rama, i cili dijet e tij i dha të enjten e 19 qershorit.
Sot do të zhvillohet zyrtarisht moduli i parë që ka të bëjë me mënyrën dhe përshtatjen e jetës së re parlamentare që i pret nga shtatori. Lektorë do të jenë Fatmir Xhafaj, Erion Braçe dhe Niko Peleshi.
“Do të diskutojnë lidhur me rolin kushtetues të deputetit, marrëdhëniet me elektoratin dhe etikën e përfaqësimit”, raportoi gazetarja Klesiana Omeri.
Gjithsej në këtë akademi politike për deputetët e rinj do të ketë pesë module. Ai i radhës do të zhvillohet nga datat 27 deri më 29 Qershor.
“Për dy ditë do të kenë në fokus funksionimin e parlamentit, arkitekturën e Kuvendit, mënyrën si funksionojnë komisionet parlamentare, seancat plenare, por edhe procesi legjislativ”, raportoi gazetarja.
Më 4 dhe 6 Korrik do të ketë leksione sa i përket marrëdhënieve ndërinstitucionale dhe ndërkombëtare, marrëdhëniet me ministritë dhe bashkitë.
Komunikimi politik do të jetë në fokus të ligjvënësve të rinj nga data 11 deri më 13 korrik. Moduli i pestë do të jetë Partia Socialiste dhe vizioni për Shqipërinë 2030 ku do të ketë në fokus kryesisht diskutime se si funksionojnë fushatat elektorale, me qëllimin që ka selia rozë për Shqipërinë 2030.
“Duket se është një lloj përgatitje për jetën parlamentare që i pret që shpeshherë është edhe e ashpër dhe mungesa e eksperiencës pa dyshim bën që të ketë disavantazhe sa i përket përballimit të jetës parlamentare dhe mesa duket socialistët kanë zgjedhur këtë formë për t’i trajnuar gjatë verës dhe më pas për të qenë gati në shtator”, raportoi gazetarja Omeri. /tvklan.al
