Procesi i rinumërimit të votave për zgjedhjet parlamentare të 11 majit, vijon edhe sot në Tiranë, me vëmendje të lartë sidomos nga Partia Demokratike dhe aleatët e saj, që shpresojnë në ndryshime në rezultatet përfundimtare.
Deri tani, siç pasqyrohet edhe në faqen zyrtare të KQZ, janë rinumëruar 85 kuti votimi.
Nga ky proces, Partia Socialiste ka humbur 42 vota, ndërsa Partia Demokratike dhe koalicioni i saj kanë 19 vota më pak. Edhe Partia Socialdemokrate ka pësuar një ulje prej 7 votash.
Ndryshe paraqitet situata për disa nga partitë më të vogla, të cilave pas rinumërimit u janë shtuar disa vota.
Rinumërimi ka sjellë lëvizje edhe në listat e hapura të kandidatëve për deputetë. Te demokratët, ku gara është mes Ilir Alimehmetit dhe Jorida Tabakut për një mandat, të dy kanë përfituar më shumë vota. Alimehmeti ka fituar 4 vota më shumë, ndërsa Tabaku 11 vota shtesë.
Ndërkohë, në kampin socialist gara më e ngushtë është mes Blerina Gjylametit dhe Olta Xhaçkës, të ndara nga vetëm 128 vota. Pas rinumërimit, Gjylametit i janë shtuar 2 vota, ndërsa Xhaçkës i është zbritur 1.
Rast interesant është ai i Fatmir Xhafajt, të cilit pas rinumërimit rezulton t’i jenë numëruar më parë 32 vota më shumë nga sa kishte realisht.
Procesi pritet të vijojë për më shumë se një javë, me fokusin veçanërisht te Tirana, ku çdo votë mund të ndikojë në ndarjen përfundimtare të mandateve./tvklan
