Ministrja e Turizmit dhe Mjedisit, Mirela Kumbaro, inspektoi sot vijën bregdetare në Durrës, teksa u shpreh se do të ketë tolerancë zero ndaj bizneseve që shkaktojnë pirgje me plehra.
E shoqëruar nga kryetarja e bashkisë së këtij qyteti, Emirjana Sako, Kumbaro tha se ky muaj po paraqet mjaft problematika, megjithatë po bëhet një punë e madhe qoftë për sistemimin e plazheve publike, mjedisin e pastër apo mirëmbajtjen e rrugëve.
“Vëzhgimi me mjetet e policisë kufitare është i domosdoshëm për të shpëtuar jetë dhe sidomos kontrollin e mjeteve të paligjshme, që janë skafet, Jet Ski-të, që duhet të kontrollohen vazhdimisht. Ka filluar puna për plazhet e pastra, e shtrirë në të gjithë bregdetin. Nga Velipoja në Ksamil, janë dyfishuar forcat, njerëzit, koshat”, tha ministrja. Ministrja Kumbaro shtoi se do të dezinfektohen hapësirat ku grumbullohen mbetjet, ndërsa rrugët do të lahen përgjatë natës.
Më tej ajo u ndal te një rast konkret në Gjirin e Lalëzit ku theksoi se shpesh janë bizneset ato që shkaktojnë pirgje me plehra.
“Te Gjiri i Lalëzit do monitorojmë 24 orë territorin, jo më larg se dje pamë pirgje mbeturinash në pyll nga bizneset. Më vjen keq, por toleranca do të jetë zero, policia është në aksion. Për pjesën e mirëmbajtjes së rrugëve kemi bashkëpunim me ARRSH-në. Do jetë një sezon me fluks turistik, tani në qershor kemi aq problematika sa kemi pasur vjet në gusht. Çdo sinjalizim nga qytetarët apo bizneset na ndihmon”, përfundoi Kumbaro.
