Shpesh herë kur na komplimentojnë për diçka, sidomos për nga dashamirësia dhe ëmbëlsia jonë, ne shqiptarët themi “jemi të ëmbël vetë”.
Kështu është shndërruar dhe studioja e “Opinion” në Tv Klan, mbrëmjen e sotme, ku do të shihni jo vetëm ëmbëlsira, por gjithashtu do të ëmbëlsoheni me historitë e fillimit të këtyre bizneseve që sot janë në treg falë recetave të tyre të shijshme.
E tillë është dhe “Pastiçeri Eagle”, në Shkodër, e cila është e pranishme në treg që prej vitit 1992. Themeluesi i saj, Adi Alivoda, tregon se gjithçka nisi nga një makineri akullore të marrë nga Stambolli i Turqisë.
Kjo makineri akullore, e cila u “shpërngul” nga Turqia në Shkodër, ishte e para makineri akullore “demokrate” për këtë qytet, referuar faktit se vendi s’kishte shumë që kishte dalë nga periudha e komunizmit.
“Falë një miku të familjes, morëm viza për Turqi. Shkuam për të blerë rroba, mall për të shitur, e në një nga këto rrugë, në një cep të Stambollit, pamë një makineri akullore. U afruam, pa pasur idenë e akullores, pa pasur absolutisht lidhje me akulloren. U afruam.
Një plak, një burrë i moshuar. I them, a e shet? Po tha, e shes. Ja morëm makinën e akullorës, e sollëm në Shkodër. Ishte makina e parë e akullores në Shkodër demokrate. Sepse, të gjitha makineritë që ishin, ishin të kohës së komunizmit”, tha ai.
Alivoda, tregon se kjo makineri akullore ishte burim të ardhurash për periudhën e verës. Pas rreth 3 vitesh, nisi dhe krijimi i pastiçerisë “Eagle”.
“Punuam dy, tre vite, vetëm verës. Në dimër vazhdonim prap me rrobat, veshmbathjet në Turqi. Pas 3 vjetëve hapëm dyqanin tonë. Lindi nevoja e pastiçerisë, që nuk do punonte vetëm verës. E kështu, filluam pastiçerinë”, tha ai.
Sipas Alivodës, risi asokohe nuk ishte makineria e akullores, por gjithashtu dhe kaushët e llojeve të ndryshme.
“Kur morëm makinën e akullores, morëm dhe kaushat e akullores. Hera e parë. Ne s’kishim parë kaushë të bukur, 3-4 llojësh. E kur hapëm, morëm nja 20-30 koli, ato mbaruan brenda një jave. Se njerëzit, vinin jo vetëm për akullore, por edhe për kaushin. Ishte një gjë e paparë për kohën”, tha ai./tvklan
