Sekretari i Përgjithshëm i Partisë Demokratike, Flamur Noka ka ngritur sot akuza ndaj kryetares së Kuvendit për shtyrjen e seancës së javës së kaluar.
Gjatë fjalës së tij, Noka tha se turet turistike të PS nuk mund të bllokojnë axhendën e parlamentit.
“Është shumë e turpshme dhe e papranueshme që spikerja e parlamentit t’u thotë parlamentit të ma dini për nder që po bëj këto seanca.
Ky parlament është i zgjedhur nga sovrani dhe sovrani na ka zgjedhur për të vazhduar punën në shërbim të ligjit, Kushtetutës dhe interesave të sovranit. Nuk është çështje humori e spikeres që thotë e mbyll sot dhe e mbyll.
Turet tuaja turistike nuk mund ta bllokojnë axhendën e këtij parlamenti. Parlamenti ka dy nënkryetarë që mund ta zhvillojnë”, tha Noka.
Më tej, ai paralajmëroi Spiropalin se do të zëvendësohet nga deputetja e zgjedhur e Elbasanit në vjeshtë, Sara Mila.
“Vjeshta ikën bashkë me vapën dhe do vijë Sara aty të zërë vendin tënd, përpiqu të ruash dinjitetin e institucionit që drejton”, tha ai.
