Air India, avioni i të cilës u rrëzua në Ahmedabad konfirmoi se 241 pasagjerë në bord kanë humbur jetën si pasojë e kësaj ngjarje. I mbijetuari i vetëm është një indiano-britanik, rastin e të cilit e kemi raportuar edhe më herët.
“Përpjekjet tona janë të fokusuara tashmë në nevojat e të gjithë njerëzve të prekur, familjeve dhe dashurve të tyre. Kompania po bashkëpunon plotësisht me autoritetet për të hetuar këtë incident”, tha Air India.
Ndërkohë ministri për Çështjet e Brendshme, Amit Shah, tha se po vijojnë analizat e ADN-së për viktimat. Sipas tij, vetëm pas përfundimit të plotë të tyre, do të ketë një numër zyrtar të viktimave.
Vishwash Kumar Ramesh, i mbijetuari i vetëm i kësaj tragjedie, ka qenë i ulur në një sedilje pranë derës së emergjencës. Indiano-britaniku ka mundur të shpëtojë pasi është hedhur nga aty, sipas policisë. Megjithatë nuk kuptohet se kur e ka kryer këtë veprim, para apo pasi u rrëzua avioni.
40-vjeçari po udhëtonte bashkë me të vëllanë pasi kishin vizituar të afërmit në Indi. Por nga udhëtimi shpëtoi vetëm ai, ndërsa tjetri humbi jetën.
Hetimet për një ndër aksidentet më të rënda ajrore po vijojnë, teksa aktualisht shkaqet e ngjarjes mbeten të paqarta.
