Fusha e mbetjeve në qytetin e Vlorës u përfshi para disa ditësh nga flakët e zjarrit, fenomen ky i përsëritur vit pas viti.
Për këtë, por dhe për problemet e ndryshme me të cilat përballet turizmi në Shqipëri, po diskutohet mbrëmjen e sotme në emisionin ‘Opinion’, në TV Klan.
Moderatori Blendi Fevziu nuk hezitoi ta quajë “bomba atomike”, ndërkohë që Sekretari i Përgjithshëm i Partisë Socialiste Blendi Klosi, e cilësoi një “rast me prapavijë kriminale”.
“Nuk është e rastësishme që çdo vit, për dy, tre ditë është kjo bomba atomike. Realisht mendoj se do ketë një zgjidhje”, tha Klosi.
Një gjë të tillë e kundërshtoi Ornela Çuçi. Sipas saj, për atë që po ndodh në qytetin bregdetar, e ka përgjegjësinë vetëm bashkia.
“Arsyeja pse vihet zjarri aty dhe është një denoncim që dua ta bëj patjetër, duhet që ato sasi mbetjesh të ulen në tonalitet. Se nëse nuk ulen, s’ke ku hedh më mbetje. Vetëm për këtë digjet, për të ulur tonalitetin në landfill.
E dyta, ligji i mbetjeve njeh vetëm një përgjegjës, kryetari i bashkisë që menaxhon atë landfill. Për menaxhimin dhe ruajtjen. Dikur 15,16 kryetarë bashkish e komunash janë gjobitur, për shkak të kësaj pune. Zjarri i përsëritur nuk ka asnjë arsye piromane, por institucionale”, tha Çuçi.
