Gjykata e Shkallës së Parë e Tiranës, ka rrëzuar padinë e bërë nga kryeministri, Edi Rama kundrejt ish-kryedemokratit, Lulzim Basha.
Përmes një njoftimi zyrtar, gjykata thekson se padia e bërë nuk është e bërë mbi bazën e provave e të ligjit.
Kujtojmë se në padi, Rama kërkonte që Basha ta demshpërblente kryesocialistin me vlerën e 1 milionë lekë si gjobë, si pasojë e thënieve të pavërtëta të bërë në 22 tetor 2018, shkruan tvklan.
“Gjykata e Shkallës së Parë të Juridiksionit të Përgjithshëm Tiranë, Dhoma Civile, më datë 11.06.2025, pasi shqyrtoi në seancë gjyqësore, në praninë e përfaqësuesit të palës paditësë, kërkesën me paditës:
Edi Rama, të paditur Lulzim Basha, me objekt:
“1. Detyrimi i të paditurit të shpërblejë dëmin jo pasuror, shkaktuar paditesit, si rezultat i thënieve të pavërteta të deklaruara prej tij, nga selia e Partisë Demokratike, në prononcim për mediat me datë 22.10.2018, në shumën 1.000.000 (një milion) lekë si dhe shpenzimet gjyqësore dhe ato avokatore.
2. Detyrimi i të paditurit të publikojë një përgënjeshtrim në të gjitha mediat që kanë publikuar deklaratën apo lajmin mbi të, sipas listës së përcaktuar në pikën D.2 të kërkesë padisë”.
Gjykata, bazuar në rrethanat e konstatuara gjatë hetimit gjyqësor, në dispozitat ligjore përkatëse dhe në arsyetimin e mësipërm, çmon se padia nuk duhet pranuar pasi është e pabazuar në ligj dhe në prova,
PËR KËTO ARSYE;
Gjykata mbështetur në nenet 126, 306 deri 310 të Kodit të Procedurës Civile
V E N D O S I:
- Rrëzimin e padisë pasi është e pabazuar në ligj e në prova.
- Shpenzimet gjyqësore në ngarkim të palës paditëse.
- Kundër vendimit mund të bëhet ankim në Gjykatën e Apelit Juridiksioni i Përgjithshëm brenda 15 (pesëmbëdhjetë) ditëve duke nisur afati nga e nesërmja e komunikimit të vendimit të arsyetuar.
- Shpallet sot në Tiranë më datë 11 qershor 2025“, njofton Gjykata e Tiranës.
