Karen Bass, kryetarja e Bashkisë së Los Angeles-it, është përballur me kritika të ashpra nga republikanët dhe Presidenti Donald Trump pas protestave kundër bastisjeve të Agjencisë për Emigracionin dhe Doganat, ICE, ndaj emigrantëve në qytet. Trump e ka quajtur atë “kriminele” dhe “të paaftë”, duke e akuzuar se po nxit trazirat, ndërsa Bass ka mbrojtur qëndrimin e saj, duke deklaruar: “Los Angeles do të mbetet gjithmonë një qytet krenar i emigrantëve dhe ne do të mbrojmë komunitetin tonë.”
Reagimi ndaj bastisjeve
Të premten, agjentët federalë me uniforma ushtarake bastisën një dyqan veshjesh në Fashion District, një nga zonat më të prekura nga operacionet e ICE. Bass vizitoi vendin dhe e quajti bastisjen “skandaloze dhe të papranueshme”, duke u shprehur se emigrantët nuk janë vetëm dhe se qyteti do të luftojë për ta.
Karriera dhe angazhimi për të drejtat civile
Bass, e lindur në Los Angeles në vitin 1953, u frymëzua nga lëvizja për të drejtat civile që ndiqte në televizion me të atin. Në vitet ’70, ajo u angazhua në aktivizëm dhe më vonë themeloi Community Coalition, një organizatë që luftonte kundër varfërisë dhe dhunës së bandave në Los Angeles-in jugor.
Në vitin 2008, ajo u bë gruaja e parë afro-amerikane që drejtoi një asamble legjislative shtetërore në SHBA. Gjatë karrierës së saj, ajo ka promovuar reforma në sistemin gjyqësor dhe penal, duke bashkë-sponsorizuar një projektligj për reformën e policisë pas vrasjes së George Floyd.
Mandati si kryetare e Bashkisë
Në vitin 2022, Bass u zgjodh kryetarja e parë femër e Los Angeles-it, duke mundur miliarderin Rick Caruso. Që në ditën e parë, ajo shpalli gjendjen e jashtëzakonshme për krizën e të pastrehëve dhe nisi një plan për strehimin e dhjetëra mijëra personave.
Tani, ajo përballet me një sfidë të re, pasi administrata Trump e ka akuzuar për neglizhencë dhe e ka quajtur “bashkëpunëtore të kaosit”. Trump ka deklaruar se qeveria federale do të ndërhyjë për të ndalur trazirat dhe plaçkitjet, duke e kritikuar ashpër Bass dhe guvernatorin Gavin Newsom.
Në mes të tensioneve, Bass ka riafirmuar qëndrimin e saj kundër deportimeve dhe ka refuzuar bashkëpunimin mes policisë së Los Angeles-it dhe autoriteteve federale. Pavarësisht kritikave, ajo ka mbetur e palëkundur në mbrojtjen e komunitetit të emigrantëve në qytet.
