Shtetet e Bashkuara të Amerikës i vunë veton një projektrezolute të Këshillit të Sigurimit të OKB-së që kërkonte një “armëpushim të menjëhershëm, pa kushte dhe të përhershëm” midis Izraelit dhe militantëve të Hamasit në Gaza dhe qasje të papenguar në ndihma në të gjithë enklavën e shkatërruar nga lufta.
14 vendet e tjera në këshill votuan në favor të draftit, ndërsa kriza humanitare ka përfshirë enklavën me më shumë se 2 milionë banorë, ku uria kërcënon jetën e tyre.
“Shtetet e Bashkuara kanë qenë të qarta, ne nuk do të mbështesim asnjë masë që nuk dënon Hamasin dhe nuk bën thirrje që ai të çarmatoset. Në muajt e fundit, Hamasi ka hedhur poshtë propozime të shumta për armëpushim, përfshirë një të fundit që do të siguronte një rrugë për t’i dhënë fund këtij konflikti dhe për të liruar 58 pengjet e mbetura. Kjo rezolutë minon përpjekjet diplomatike për të arritur një armëpushim. I bëjmë thirrje OKB-së dhe OJQ-ve që të mbështesin Fondacionin Humanitar të Gazës për ta ndihmuar atë të ofrojë ndihmë në mënyrë të sigurt”, tha ambasadorja e SHBA në OKB, Dorothy Shea.
Izraeli ka hedhur poshtë thirrjet për një armëpushim të pakushtëzuar, duke thënë se Hamasi nuk mund të qëndrojë në Gaza. Ambasadori i Izraelit në OKB, Danny Danon, u tha anëtarëve të këshillit që votuan në favor të draftit se ata zgjodhën një rrugë që nuk çon në paqe por në më shumë terror.
Ndërkaq, Fondacioni Humanitar i Gazës (GHF) nuk do të rifillojë menjëherë shpërndarjen e ndihmave në territorin e shkatërruar nga lufta pas një mbylljeje njëditore të mërkurën, duke thënë se operacionet do të rifillojnë kur të përfundojnë punimet e mirëmbajtjes dhe riparimit në vendet e shpërndarjes.
Në një deklaratë thuhet se “vendet e saj të shpërndarjes nuk do të hapen” të enjten dhe se do të “ndajë informacion mbi orarin e hapjes sapo të përfundojë puna”. Fondacioni gjithashtu u bëri thirrje fuqimisht kërkuesve të ndihmës që udhëtojnë drejt vendndodhjeve të përcaktuara nga ushtria izraelite për të “siguruar kalim të sigurt”.
Ndërkaq një hetim i kryer nga CNN tregon se ushtria izraelite hapi zjarr ndaj palestinezëve pranë një vendi të ngritur nga Fondacioni Humanitar i Gazës (GHF) në Rafah ndërsa ata po përpiqeshin të merrnin ushqim të dielën e kaluar. Bazuar në dëshminë e njerëzve trupat izraelite qëlluan mbi turmat me breshëri armësh ku humbën jetën 27 persona dhe u plagosën qindra të tjerë.
Ndërkohë trupat e dy pengjeve izraelito-amerikane të rrëmbyera nga Hamasi më 7 tetor u gjetën në Gazën jugore gjatë një operacioni ushtarak, sipas një deklarate nga ushtria izraelite. Judy Weinstein-Haggai, 70 vjeç, dhe Gadi Haggai, 72 vjeç, u vranë pranë shtëpisë së tyre në Kibbutz Nir Oz gjatë sulmit të Hamasit në Izraelin jugor në vitin 2023. Kryeministri izraelit Benjamin Netanyahu në një deklaratë u shpreh se puna për të gjetur pengje të tjerë do të vijojë. Klan News
