Prokuroria e Elbasanit ka lëshuar gjashtë masa sigurie në total në lidhje me një skemë mashtrimi mes shoqërive tregtare për të shmangur detyrimet tatimore. Nga këto, pesë masa sigurimi janë “arrest me burg”, ndërsa një tjetër është në “arrest shtëpie”.
Policia e Elbasani konfirmoi nëpërmjet një njoftimi për shtyp se në total janë ekzekutuar katër prej tyre. Në pranga janë vënë tre administratorë të subjekteve. Mes tyre një është italian.
Rezulton se dy të tjerë, po nga Italia, të jenë në kërkim për këtë çështje pasi masa ndaj tyre nuk është ekzekutuar.
Ndërsa në arrest shtëpie është vendosur një ekonomiste.
Çfarë zbuluan hetimet?
Sipas prokurorisë, ata kishin krijuar një skemë mashtrimi të mirëorganizuar ku asete, punonjës dhe aktivitete ekonomik transferoheshin nga një subjekt në tjetrin. Qëllimi ishte shumë i thjeshtë: të shmangeshin detyrimet tatimore dhe fiktivizimi i operacioneve financiare.
Sipas organit të akuzës rezulton se subjektet kanë mbi 14 milionë lekë detyrime tatimore të papaguara. Nga analizimi i llogarive bankare është konstatuar se janë tërhequr mbi 2.1 milionë euro të pajustifikuara dhe pa dokumentacion mbështetës.
Prokuroria pretendon se të gjashtë personat, duke bashkëpunuar me njëri-tjetrin, janë përfshirë në një skemë duke simuluar falimentin e subjekteve dhe krijimin e tyre në mënyrë fiktive me qëllim shmangien e detyrimeve tatimore.
Kjo ka sjellë një dëm të konsiderueshëm financiar.
“Subjektet lidhen direkt dhe indirekt me njëri-tjetrin, duke qenë se aktiviteti i tyre në fushën e fasonerisë, aksionerët dhe administratorët e shoqërive, si dhe punonjësit janë të njëjtë në të gjitha shoqëritë. Asetet kanë kaluar nga një shoqëri te tjetra dhe me anë të veprimeve aktive, shtetasit dhe subjektet nën hetim kanë sjellë një dëm ekonomik të konsiderueshëm”, njoftoi Prokuroria e Elbasanit.
Por nuk ndalet këtu hetimi. Prokuroria ka dyshime se në këtë skemë janë përfshirë zyrtarë të lartë shtetërore. Bëhet fjalë për organe tatimore, doganore dhe bashkiake ku subjektet ushtronin aktivitetin e tyre. Më konkretisht në qytetet e Elbasanit, Durrësit dhe Tiranës.
Në kuadër të hetimit, me vendim të Gjykatës së Elbasanit janë vendosur nën sekuestro konservative shtatë subjekte tregtare, 12 llogari bankare dhe dhjetë automjete./tvklan.al
