Në lidhje me denoncimin e Partisë Demokratike për manipulim të votave përmes të ashtuquajturit “treni bullgar”, në fshatin Pekisht të Peqinit, Prokuroria e Elbasanit konfirmon se ka nisur hetimet në lidhje me çështjen.
Në përgjigje ndaj Partisë Demokratike, organi i akuzës në Elbasan konfirmon se është regjistruar procedimi penal për veprën penale të falsifikimit të materialit zgjedhor dhe rezultatit të zgjedhjeve të parashikuar nga neni 326 i Kodit Penal.
Sipas Prokurorisë së Elbasanit aktualisht ky procedim ndodhet në fazë hetimi.
Nisja e hetimeve, erdhi pas denoncimit që bëri kreu i PD, Sali Berisha dhe kandidati demokrat Bledi Himçi se në një lokal në fshatin Pekisht, u gjetën disa materiale të dyshuara zgjedhore.
Përgjigja e Prokurorisë për Partinë Demokratike:
PARTISË DEMOKRATIKE TË SHQIPËRISË
Në përgjigje të kërkesës suaj të protokolluar pranë nesh me Nr.5470, datë 26.05.2025, lidhur me informacionin e kërkuar për ngjarjen e datës 22.05.2025 të ndodhur në fshatin Pekisht Peqin, ju bëjmë me dije se:
Nga verifikimi i kryer nga zyra e regjistrit rezulton të jetë regjistruar procedimi penal Nr. 522 datë 26.05.2025, për veprën penale të
“Falsifikimi i materialit zgjedhor dhe rezultateve të zgjedhjeve” të parashikuar nga neni 326 i Kodit Penal. Aktualisht ky procedim ndodhet në fazë hetimi.
