Një ligj i ri i miratuar në Kaliforni ndalon ngritjen e kampeve nga të pastrehët në hapësira publike, si trotuare, parqe apo shtigje biçikletash. Masa vjen pas një urdhri ekzekutiv të guvernatorit Gavin Newsom, i cili u bën thirrje qeverive lokale të largojnë tendat nga zonat publike dhe të zbatojnë ndalimet me forcë ligjore.
Vendimi ka shkaktuar debat të gjerë në opinionin publik dhe shoqërinë civile, sidomos për shkak të faktit se ndalimi zbatohet edhe në mungesë të shtretërve të disponueshëm për strehim, pas një vendimi të Gjykatës Supreme të SHBA-së në vitin 2024 që i hapi rrugën ligjeve më të rrepta ndaj kampimit nga të pastrehët.
Ndërkohë, autoritetet e Kalifornisë njoftuan shpërndarjen e 3.3 miliardë Dollarëve në grante për komunitetet vendore, me synimin për të zgjeruar mundësitë e strehimit dhe trajtimit të shëndetit mendor për individët më të rrezikuar. Këto fonde shtohen mbi 24 miliardë Dollarë të shpenzuar më parë në mbi 30 programe për të adresuar krizën e të pastrehëve.
Megjithatë, efektet e këtyre investimeve janë vënë në pikëpyetje, pasi disa auditime të fundit zbuluan mungesë transparence dhe dështim në menaxhimin e fondeve, ndërkohë që numri i të pastrehëve nuk ka shënuar ulje të dukshme.
“Është e paligjshme të jetosh në tenda. Policia të kërkon të largohesh menjëherë, përndryshe arrestohesh. Nuk ka më ku të ngresh kamp.Nëse janë caktuar miliarda dollarë, pse nuk ka një ndërtesë këtu afër ku njerëzit mund të marrin ndihmë? Nuk ka punonjës socialë, as shërbime bazë. Nuk shoh asgjë që ndihmon realisht”, tha John Coy, një i pastrehë në Kaliforni.
Vendimi për ndalimin e kampingjeve shihet nga kritikët si një masë ndëshkuese, që nuk adreson shkaqet e pastrehësisë, por vetëm synon të zhdukë dukurinë nga sytë e publikut. Ndërkohë, hetimet për menaxhimin e fondeve publike vazhdojnë, ndërsa mijëra banorë mbeten pa strehë dhe pa alternativa të qarta. Klan News
