Rusia ka ndërmarrë për natën e dytë radhazi një valë të re sulmesh me dronë dhe raketa balistike ndaj Ukrainës. Kryeqyteti Kiev që ishte sërish në qendër të goditjeve.
Sipas raportimeve të dielën në mëngjes, në të gjithë vendin u vranë nëntë persona, mes tyre tre fëmijë në rajonin e Kievit, ndërsa dhjetëra të tjerë u plagosën.
Presidenti ukrainas, Volodymyr Zelensky, tha se ky intensitet sulmesh tregon se Moska po e zgjat me qëllim luftën dhe përsëriti thirrjen për sanksione më të forta ndaj Rusisë.
Megjithatë, ai theksoi se pret që marrëveshja për shkëmbimin e të burgosurve të vazhdojë, pas bisedimeve të zhvilluara javën e kaluar në Stamboll.
Goditjet ruse prekën zona në të gjithë vendin, nga jugu dhe lindja deri në pjesën perëndimore.
Shërbimet e emergjencës konfirmuan se katër prej viktimave, përfshirë tre fëmijë, u vranë në rajonin e Kievit nga “një sulm masiv gjatë natës” që la të plagosur edhe 16 persona të tjerë. Kryebashkiaku i Kievit, Vitali Klitschko, njoftoi se mes objekteve të goditura ishte edhe një konvikt studentësh.
Edhe qytete të tjera si Odesa, Dnipro, Sumy, Konotop, Chernihiv, Ternopil dhe Kharkiv u goditën, sipas asaj që shkruan The Guardian.
Ndërkohë edhe të shtunën u raportua për sulme nga Rusia gjatë natës. Si pasojë mbetën të plagosur 15 persona.
Këto sulme ndodhin në një moment kur të dyja palët po zbatojnë shkëmbimin më të madh të të burgosurve, në fakt një prej momenteve të rralla të bashkëpunimit mes palëve, që nga fillimi i pushtimit rus të Ukrainës në Shkurt 2022.
