Në qendrën e votimit, në shkollën 9-vjeçare “28 Nëntori” raportohet një konflikt që ka përfunduar në të shtëna me armë zjarri.
Mësohet se dy qytetarë të identifikuar si K.P., dhe A.Ll., janë konfliktuar me njëri tjetrin fillimisht me fjalë brenda perimetrit të sigurisë.
Më tej debati ka degraduar me përdorimin e armës së zjarrit jashtë perimetrit të sigurisë së qendrës së votimit.
“Në Fushë Milot, jashtë perimetrit të qendrave të votimit, ka ndodhur një konflikt verbal mes dy shtetasve, ku, sipas një telefonuesi, është dëgjuar një zhurmë e ngjashme si e shtëna me armë zjarri.
Menjëherë në vendngjarje kanë mbërritur shërbimet e policisë, ku nga këqyrja e vendit të ngjarjes nuk është gjetur asnjë gëzhojë apo send tjetër i kundërligjshëm.
Në vijim të veprimeve hetimore, janë identifikuar personat e përfshirë në konflikt, konkretisht shtetasit K. P. dhe A. Ll., dhe po punohet për lokalizimin dhe shoqërimin e tyre.
Procesi i votimit vazhdon normalisht në të gjitha qendrat e votimit dhe nga KQV-të apo Koordinatorët e sigurisë, nuk është kërkuar ndërhyrja e policisë”, njofton policia.
Grupi hetimor, i ndodhur në vendngjarje, po vijon veprimet për zbardhjen e plotë të rrethanave të ngjarjes.
