Kryeministrja Giorgia Meloni, gjatë Orës së Pyetjeve në Senatin italian deklaroi vendosmërinë e saj për të çuar përpara reformat institucionale dhe të drejtësisë, si dhe mbrojti me forcë strategjinë për menaxhimin e emigrantëve të parregullt nëpërmjet qendrave të ngritura në Shqipëri.
“Reforma e Kryeministrisë është në lëvizje,” tha Meloni. “Vazhdoj ta konsideroj atë nënën e të gjitha reformave. Edhe pse nuk varet vetëm nga unë, por nga Parlamenti, shumica është e vendosur të ecë shpejt, si me këtë reformë, ashtu edhe me atë në drejtësi.”
Në lidhje me çështjen e emigrantëve, Giorgia Meloni deklaroi se mbi 25% e atyre të mbajtur në Shqipëri janë riatdhesuar brenda javës së parë.
“Kjo tregon qartë që strategjia jonë funksionon, pavarësisht përpjekjeve për ta bllokuar për arsye ideologjike,” theksoi ajo.
Nga ana tjetër, Meloni u përgjigj edhe pyetjeve për luftën kundër emigracionit të paligjshëm, duke theksuar se qeveria synon “një Itali që zbaton rregullat dhe mbron sigurinë e qytetarëve të ndershëm.”
Duke iu referuar disa vendimeve të gjykatave për të kthyer emigrantët në Itali, Meloni shprehu shqetësimin e saj: “Thuajse të gjithë emigrantët e transferuar në Shqipëri kanë kryer vepra të rënda penale – nga vjedhja e deri te dhuna seksuale dhe pornografia me të mitur. Disa duan t’i mbajnë me çdo kusht këta persona në Itali, por ne jemi të vendosur për t’i riatdhesuar.”
Ajo vuri gjithashtu në dukje se lista e vendeve të sigurta të Bashkimit Evropian, si dhe propozimet e fundit të Komisionit Evropian për reformën e Paktit për Migracionin dhe Azilin, e konfirmojnë drejtësinë e qëndrimit të Italisë: “Fakti që po diskutohet për një listë të përbashkët të vendeve të sigurta është një lajm shumë i mirë – edhe këtu, konfirmohet se nuk kishim gabuar.”
