Goditi me grushtshoferin e një kamioni është vënë në pranga vëllai i kandidatit për deputet. Siç raporton ‘Klan’ është arrestuar nga policia e Korçës, Alti Nallbati, vëllai i kandidatit për deputet i Partisë Demokratike, Bledion Nallbati, pasi ka goditur me grush shoferin e një kamioni.
Sipas njoftimit të uniformave blu, ngjarja ka ndodhur mbrëmjen e djeshme rreth orës 21.15, pranë rrethrrotullimit të Mirasit në Bilisht.
Dy vëllezërit Nallbati po lëviznin me automjet, kur Alti Nallbati ka dalë nga makina dhe ka nisur debat me shoferin e një kamioni. Ai ka tentuar të zbresë shoferin e kamionit me forcë nga mjeti e ka tentuar ta qëllojë me grushte. Demokrati ka tentuar sakaq të qetësojë situatën, por më pas dhe ai ka tentuar të zbresë shoferin nga kamioni.
Vëllai i kandidatit për deputet është arrestuar për veprat penale “Dëmtime të tjera me dashje”, “Prishja e qetësisë publike”, dhe ” Pengimi i qarkullimit të mjeteve të transportit”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Njoftimi i Policisë:
Specialistët për Hetimin e Krimeve në Komisariatin e Policisë Devoll në përfundim të veprimeve të kryera në lidhje me një konflikt të ndodhur mbrëmjen e djeshme në rrethrrotullimin e Bilishtit, arrestuan në flagrancë shtetasin A. N. 42 vjeç, banues në Devoll, për veprat penale “Dëmtime të tjera me dashje”, “Prishja e qetësisë publike”, dhe ” Pengimi i qarkullimit të mjeteve të transportit”.
Arrestimi i tij u bë pasi u kap në flagrancë menjëherë pas konfliktit të ndodhur midis shtetasve A.N, B.N dhe shoferit te një kamioni transporti shtetasi S.D.
Gjatë këqyrjes së pamjeve filmike dhe kryerjes se veprimeve të tjera hetimore, rezultoi se më datë 03.05.2025, rreth orës 21:15 , në afërsi të rrethrrotullimit të Mirasit në qytetin e Bilishtit shtetasi A.N, ka ndaluar automjetin me të cilin lëvizte bashkë me vëllanë e tij shtetasin B.N (kandidat për deputet i një subjekti politik) duke penguar qarkullimin e automjeteve që lëviznin në këtë aks rrugor.
Shtetasi A.N ka dalë nga automjeti dhe ka debatuar verbalisht me një drejtues kamioni, dhe më pas ka tentuar ta zbresë me forcë nga kamioni shtetasin S.D, dhe ka tentuar ta qëllojë me grushte si dhe ta ofendojë duke kryer veprime të pa hijshme në publik. Në këtë konflikt është përfshirë edhe vëllai i tij, shtetasi B.N, ku fillimisht ka tentuar të qetësojë situatën por më pas, bazuar në pamjet filmike ka tentuar të zbresë me forcë nga kamioni shtetasin S.D.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
