Kreu i PD, Sali Berisha prezantoi planet për biznesin fason, ku deklaroi se do të ketë kompensim për humbjet nga rënia e euros dhe sipas tij prioritet do të jetë ulja e çmimit të energjisë.
Ai i bëri këto deklarata në këtë takim në kuadër të fushatës elektorale për 11 majin, ku ka prezantuar disa masa të reja që do të ndërmerren nëse PD-ja vjen në pushtet.
“Në qeverisjen tonë, do të kemi një revolucion fiskal. Ne do të krijojmë klimën më miqësore për biznesin, dhe kjo nuk është thjesht një premtim, por një angazhim konkret,” tha Berisha. Ai shtoi se një nga masat e para do të jetë kompensimi për çdo humbje që bizneset kanë pësuar nga rënia e euros, duke garantuar që çdo eksportues do të ketë një bord që do të kompensojë “qindarkë për qindarkë” këtë humbje.
“Rënia e euros është një problem shumë i madh për bizneset që prodhojnë për eksport,” u shpreh Berisha, duke theksuar se qeveria aktuale ka injoruar këtë çështje dhe ka lënë pas dore përpjekjet për të ndihmuar sipërmarrësit.
