Tjetër dështim për zgjedhjen e kryetarit të Kuvendit të Kosovës. Seanca është shtyrë për të premten, pasi kandidatja e Lëvizjes Vetëvendosja, Albulena Haxhiu dështoi të emërohet kryetare e kuvendit të Kosovës edhe pas përpjekjes së tretë.
Ajo mori 57 vota pro, 46 kundër dhe 3 abstenim. Që të emërohej, Haxhiu kishte nevojë për 61 vota. Kjo është hera e pestë që deputetët e Kosovës mblidhen për të konstituuar Kuvendin, por për ta bërë këtë ata duhet të zgjedhin kryetarët dhe nënkryetarët.
Lëvizja Vetëvendosje, e cila është partia fituese e zgjedhjeve, këmbëngul në kandidaten e saj Albulena Haxhiu, pavarësisht se nuk kanë votat e nevojshme. Ndërkohë nga ana tjetër opozita e kundërshton emrin e saj.
Deputetja në radhët e AAK-së, Time Kadrijaj, tha se nuk ekziston konsensus mes partive politike për votimin e kandidates së LVV-së, Albulena Haxhiu.
“Është obligim i mazhorancës t’i sigurojë 61 votat për Albulena Haxhiun. Nuk është obligim i asnjë partie tjetër ta votojë këtë mazhorancë dhe ta votojë kryetarin e Kuvendit”, është shprehur ajo.
Ajo akuzon LVV-në për bllokadë.
“Partia në pushtet duhet t’i sigurojë 61 vota… Nëse i kanë votat për Qeveri, pse s’i kanë për kryeparlamentar? Në këtë rast, bllokues, ta dinë qytetarët e Kosovës, është Lëvizja Vetëvendosje”, është shprehur ajo.
Kujtojmë se seancat këto kohë drejtohen nga Avni Dehari si deputeti më i vjetër në sallë. Në momentin që konstituohet kuvendi, hapet rruga për formimin e qeverisë së re.
