Kreu i Aleancës për Ardhmërinë e Kosovës, Ramush Haradinaj, ka reaguar lidhur me dështimin nga ana e Lëvizjes Vetëvendosje të Kurtit për të vendosur votat e nevojshme për zgjedhjen e kryetarit të ri të Kuvendit.
Haradinaj nënvizoi se partia e tij është e gatshme për të gjetur një rrugë në konstituimin e Kuvendit të Kosovës. Ai i dha një mesazh Lëvizjes Vetëvendosje, duke u shprehur se nëse kjo parti nuk i ka votat për kandidatin e vet, duhet gjetur një kandidat tjetër më unifikues, raporton Klan Kosova. Po kështu, ai u shpreh se nëse do ishte një emër tjetër në vend të Albuena Haxhiut, AAK-ja do e votonte.
“Ne e kemi thënë si Aleancë, që po të ishte dikush tjetër në vend të zonjës Haxhiu, do e votonim. Jemi të hapur për të gjetur një rrugë për konstituimin e Kuvendit. Nëse Vetëvendosja nuk i ka votat për kandidatin e vet, atëherë të gjejmë një kandidat më unifikues”, u shpreh Haradinaj.
Kujtojmë se ditën e sotme partia e Kurtit ka dështuar sërish për të arritur votat e nevojshme për zgjedhjen e kryetarit të ri të Kuvendit në Kosovë. Sakaq, deputeti Glauk Konjufca bëri thirrje që palët të diskutojnë e të arrijnë një marrëveshje politike për këtë ngërç.
Kuvendi i Kosovës do të mblidhet sërish ditën e mërkurë, në orën 10:00 për të zgjedhur kryetarin e Parlamentit.
